Ontjekolontje

Ontjekolontje (dat kummt vun franzöösch Eau de Cologne, „Water ut Köln“) is en Rüükwater, dat toeerst in Köln maakt worrn is. Hüüt steiht de Begreep för en ganze Reeg vun Duftwaters, wo normalerwies na de Definitschoon vun Parfüms hüdigendaags 2 bet 5 % ätherisch Ööl binnen sünd.

Grundstoff is Äthanol. An Ööl kann dor ünner annern wat rankamen vun de Sitrusfrücht Sitronen, Oranschen, Mandarinen, Bergamotten, Limetten, Pampelmusen un Pomeranzen un vun de Krüder Lavennel, Rosmarin, Thymian un Jasmin.

Dat eerste Ontjekolontje hett de Italiener Johann Maria Farina 1709 in Köln maakt. Farina hett de Firma Farina gegenüber opmaakt, de hüüt noch Ontjekolontje maakt. Ofschoonst na de Definitschoon dit Ontjekolontje mit mehr as 5 % ätherisch Ööl al as Odetolett gellen müss. Aver ok annere hebbt dat Ontjekolontje later namaakt (ok wenn dat denn faken anners rüken dee), to’n Bispeel 4711.