Oktoberfest
En Oktoberfest is en Typ Volksfest. Afkamen deit disse Typ Volksfest vun dat Oktoberfest in München. Dor geev dat 1810 dat eerste Oktoberfest to de Hochtiet vun Prinz Ludwig I. mit siene Therese. Aver ok al vördem geev dat in’n Oktober in Bayern al Oktoberfest. Dat weer in’n Sommer verbaden Beer to broen. Eerst in’n Oktober dröffen de Broers wedder nee Beer broen. Dat deen se fiern un bi de Fier hebbt se dat Märzenbeer, dat se in’t Vörjohr toletzt broot harrn, opbruukt. Ut dat Oktoberfest in München is denn mit de Tiet en groot Volksfest worrn. Mit de Tiet is dat Fest mit dat Beerdrinken un de Gemütlichkeit en prototyypsch Symbol för düütsche Kultur worrn. Vör allen düütsche Utwannerers hebbt in Amerika faken ok anfungen Oktoberfest to fiern, dat se ehr düütsche Kultur wohren wullen. Ok wenn dat mehr so’n beten Klischee is as würklich en Stück Kultur vun ganz Düütschland. Dorvun keem dat, dat dat hüdigendaags ünner annern grote Oktoberfesten in Cincinnati (USA), Blumenau (Brasilien) un Kitchener (Kanada) gifft.
Grote Oktoberfesten
[ännern | Bornkood ännern]- Oktoberfest in München (üm un bi 6 Millionen Besökers)
- Oktoberfest in Hannover (üm un bi 1,1 Millionen Besökers)
- Oktoberfest in Kitchener (üm un bi 700.000 Besökers)
- Oktoberfest in Blumenau (üm un bi 600.000 Besökers)
- Oktoberfest in Cincinnati (üm un bi 500.000 Besökers)
- Oktoberfest in Igrejinha (üm un bi 180.000 Besökers)