Nugget (Metallurgie)

Vun Wikipedia
Zur Navigation springen Zur Suche springen
Platinnuggets ut Kalifornien un Sierra Leone
En Goldnugget (Sepengold) ut Kalifornien

As Nugget warrt Klutens vun Gold oder Platin betekent, de op natürliche Oort entstahn sünd.

Översicht[ännern | Bornkood ännern]

Nuggets kamt vör allen in Sepen vör un sünd tomeist stoff- oder koorngroot. Man, dat gifft ok noch annere Metallen, de in Form vun Nuggets vörkamt, so as Kopper (bannig roor). Ok natürlich gediegen Sülver warrt vundaag in de Ümgangsspraak as „Nugget“ betekent, ofschoonst de mehr as Fadens (so nöömt Lockensülver) as üm Klutens hannelt.

De gröttste Goldnugget, de bit hüüt funnen worrn is, weer mit 2316 Fienunzen Goldandeel (dat sünd ruchweg 72 kg) de so nöömte Welcome Stranger, de 1869 in Moliagul/Australie opdeckt weer[1]. Dree Johren dorna hett de düütsche Bargboünnernehmer Bernhardt Holtermann dat 214 kg swore Holtermann-Nugget in New South Wales funnen, dat en Fiengoldandeel vun ruchweg 57 kg (26,64 %) harr. Nipp un nau weer dat aver keen Nugget, man en Goldquarzbrocken mit hogen Goldandeel[2]. De Begreep Nugget warrt blots be bannig hoge Reinheitsgraden bruukt. Nuggets ut Australien hebbt faken en Reinheit vun 95 % un höger. Dat sworste Nuggets, dat in Düütschland funnen worrn is, wiggt 10,2 g. Tomeist warrt grote Goldnuggets later opsmölt. In’n Ural in Russland is 1843 en Platinnugget mit en Gewicht vun 12 kg funnen worrn.

Entstahn vun Goldnuggets[ännern | Bornkood ännern]

Nuggets enstaht bi de Erosion vun Mineralgäng, de Gold bargt. Dat Element Gold is cheemsch düchtig bestännig, so dat dör Verweddern un Transport in Strööm un Beken de Stenen üm dat Gold un ok de Quarz, de faken mit Gold tosamen vörkummt, aflöst warrt, ahn dat dta gold dorbi verfallt oder reageert. Grote Rebeden mit gediegen Gold, ut dat sik Nuggets billn künnt, sünd aver roor. Tomeist kummt dat Gold in’t Ierz fien verdeelt vör. Ut den Grund besteiht de gröttste Deel vun Goldlagersteden ut fiene Golddelen.

En annere Mööglichkeit, woans sik Goldnuggets billn künnt, is dör bakterielle Aktivität in Biofilmen. Sünnere Bakterien wannelt dat för jem giftige lööste Gold un nich giftig metallsch Gold üm, dat se denn utscheedt[3]. En Koppel vun austraalsche Forschers üm Frank Reith vun’t Forschungszentrum för Ümwelt un Mineralienexploratschoon in Bentley, Perth, hett 2006 publiek maakt, dat se in twee Goldminen op meist all Goldkoorns Biofilmen mit dat Bakterium Ralstonia metallidurans opdeckt hebbt. Dormit hebbt se to’n eersten mol Henwiesen dorop funnen, dat dat Billn vun Goldnuggets op dissen Weg mööglich is[4]

Nuggets in Düütschland[ännern | Bornkood ännern]

Anfang Mai 2004 hett en Renter dör Tofall in’t bövere Schwarzadaal in en Foord dör den Beek Katze en Goldnugget vun 9,64 g funnen[5]. Dat weer de tweetsworste Nugget de bit hüüt in Düütschland opdeckt worrn is. He harr dormols en schätzten Sammlerweert vun üm un bi 1.500 Euro. Dat weer de eerste Goldfund na 400 Johren un hett dormols en öörtlichen Goldruusch utlööst. Dat sworste Nugget weer ok in’t Schwarzadaal funnen un hett 10,2 g wogen. Dat is in en Smuckkorf ut dat 16. Johrhunnert inarbeit.

Borns[ännern | Bornkood ännern]

  1. Över Welcome Stranger
  2. Goldnugget Goldankoop Pro24 München – Över dat Holtermann- un annere Nuggets; afropen an’n 25. August 2016
  3. Regulatschoon vun de Swormetall-Homöostaas in Ralstonia metallidurans (forschung-sachsen-anhalt.de)
  4. Frank Reith, Stephen L. Rogers, D. C. McPhail un Daryl Webb: Biomineralization of Gold: Biofilms on Bacterioform Gold, Science, Band=313 vun’n 14. Juli 2006, Sieten 233–236, doi: 10.1126/science.1125878
  5. Nuggetfunde in Deutschland