Noordmelk
De Noordmelk AG (offiziellen un hoochdüütschen Naam: Nordmilch AG) weer as Aktiensellschop en Meieree-Ünnernehmen mit Seet in Bremen. Dat Ünnernehmen is 2011 dör Fusion mit de Humana Melkunion tohoopgahn to de Düütsche Melkkontoor GmbH. Stand 2009 harr dat Ünnernehmen 2452 Mitarbeiders un en Ümsatz von 1,8 Milljarden Euro.[1]
De Noordmelk verdrifft sien Melkprodukten ünner egen Markennaams (in Düütschland vör allen Milram, internatschonal Oldenburger), produzeert aver ok för Hannelsmarken un för Grootverbrukers.
Historie
[ännern | Bornkood ännern]De Grundsteen för dat Ünnernehmen is 1947 leggt worrn, as in Zeven de Zentraalmeieree Noordmelk grünnt worrn is.[2] Dat weer toeerst en GmbH, is later aver in en eG ümwannelt worrn. In de Zentraalmeieree is dat Geschäft von en ganze Reeg lüttje Meiereen tohoopfaat worrn, de vörher blots stark regionaal utricht weren.
De Milcherfassung Nordmilch hett sik 1993 grünnt, as de Genossenschaft Nedderelv-Melk (Niederelbe-Milch; grünnt 1903; harr 1993 519 Maten un en Ümsatz von 47,5 Milljonen Mark) mit de Freebörger Meieree un de Melkwarken Ünnerwerser (Milchwerke Unterweser) tohoopgahn is.[3]
1999 sünd de MZO Ollnbörger Melk eG (MZO Oldenburger Milch eG), Hansano Melkhoff Neddersassen (Hansano Milchhof Niedersachsen), Bremerland-Noordheid eG (Bremerland-Nordheide eG), NOORDMELK eG (NORDMILCH eG) un de Melkerfassung-NOORDMELK eG dör Fusion tohoopgahn un hebbt denn tohoop de Noordmelk eG billt.[2]
2001 hett dat Ünnernehmen tosätzlich de Adelbyer Noordfreesland Melk (Adelbyer Nordfriesland Milch) övernahmen.[2]
De Aktiensellschop Noordmelk AG as 100-%-Dochter von de Noordmelk eG is 2006 grünnt worrn.[2] Dor is dat operative Geschäft von de eG in tohoopfaat worrn.[2]
2010 is de Noordmelk mit de Meiereegenossenschaft Dargun eG Pommernmelk (Molkereigenossenschaft Dargun eG Pommernmilch) tohoopgahn un hett tosätzlich de Zentraalkeseree Mekelborg-Vörpommern GmbH (Zentralkäserei Mecklenburg-Vorpommern GmbH), an de de Noordmelk vörher al bedeligt weer, to 100 % övernahmen.[2]
In’n September 2010 is bekannt worrn, dat de Noordmelk un de Humana Melkunion dör Fusion tohoopgahn wüllt un dat Bundskartellamt harr dor keen Inwänn gegen. Dorto is de Noordmelk AG toeerst in’n Februar 2011 in en GmbH ümwannelt worrn. Dat ne’e Ünnernehmen besteiht siet 1. Mai 2011 un driggt den Naam Düütsch Melkkontoor (DMK). Dat is von de Ünnernehmensform en GmbH. De Noordmelk eG is aver sülvstännig bleven un is nu blangen de Humana-Grupp de twete Besitter von de GmbH.
Normi
[ännern | Bornkood ännern]1955 hett de Noordmelk in Zeven anfungen, Melkpulver hertostellen, dat in de Optucht von Kalver insett warrt.[4] Ut Nordmilch is de Markennaam Nor-Mi (later Normi) afkört worrn.[4] Dat Geschäft mit Fodermiddels för Jungveh op Basis von Melk is 2006 von Noordmelk in dat Dochterünnernehmen Norlac GmbH utlagert worrn.[4]
Vörsitters von’n Opsichtsraad
[ännern | Bornkood ännern]- –2011: Otto Lattwesen
Vörstänn
[ännern | Bornkood ännern]- –2011: Josef Schwaiger, Volkmar Taucher
Standöörd
[ännern | Bornkood ännern]Dat Ünnernehmen harr toletzt alltohoop söven egen Standöörd un veer Dochterünnernehmens.
De egen Standöörd weren Zeven, Erwech, Neebörger, Noordhacksteed, Hogenwesteed, Strückhusen un Sleswig. De veer Dochterünnernehmens weren in Dargun, Meideborg, Woren un Hollrup. De Zentraal weer in Bremen.
Standöörd in Isernhagen un Beesten sünd 2008 dichtmaakt worrn.
Sport
[ännern | Bornkood ännern]De Noordmelk AG weer Hauptsponsor von dat Radsportteam Team Milram, dat mehrmaals bi de Tour de France mitmaakt hett. In’ Juli 2010 hett Noordmelk bekannt geven, dat dat Ünnernehmen 2011 för dat Radsportteam keen Lizenz mehr beandragt, wat dat UT för datTeam bedüden dee.
Footnoten
[ännern | Bornkood ännern]- ↑ De Tall gellt för den Kunzern, de GmbH sülvs harr 2009 2147 Mitarbeiders; Geschäftsbericht 2009
- ↑ a b c d e f Ünnernehmensgeschicht von dat DMK
- ↑ Heute vor 25 Jahren. Niederelbe-Zeitung an’n 21. März 2018
- ↑ a b c 60 Jahre NORMI – 60 Jahre sicher ins Leben starten