Nigerstroom

Vun Wikipedia
Wesseln na: Navigatschoon, Söök

De Nigerstroom is nah den Nil un den Kongo de drüttlängst Stroom in Afrika. He is 4.184 km lang, man dat steiht ok af un an to lesen, dat he man bloß 4.160 km lang is.

De Loop[ännern | Bornkood ännern]

De Soot vun den Niger liggt in de Bargen vun Guinea. Vun dor flutt he in eenen groten Bogen nah Nordoost. In Mali geiht he in de Massina över. Later flutt he nah Timbuktu, röögt man eben an de Sahara an un geiht wieder nah Südoost. He ströömt dwars dör de Republik Niger, de ehr Hooftstadt Niamey an siene Övers boot is. Later maakt he de Grenz nah Benin ut un flutt denn fudder nah Nigeria. Dor warrt he upstaut to den Kainji-Stausee. Amenn münnt he denn in den Golf vun Guinea, wat een Deel vun den Süüdatlantik is. De Münn is een groot Delta, dat Nigerdelta.

An den Niger sien Münn ströömt in’n Dörsnitt up’t Jahr in jede Sekunn 6.000 m³ Water in de See.

Schipperee[ännern | Bornkood ännern]

In den eersten Deel vun den Niger is de Schipperee bloß mit lüttje Bööt möglich. Dat gifft dor allerhand Gefahren bi. Dor höört ok de Nilpeer mit to. Eerst vun Koulikoro af an könnt ok gröttere Scheepe up den Stroom fahren. Düsse Oort liggt bi 60 km Stroom dal vun Bamako.

De Naam[ännern | Bornkood ännern]

De Naam vun den Stroom kümmt woll vundat latiensche oder portugeesche Woort niger. Dat bedutt Swart. Kann aber ok angahn, dat sik dat ut de Spraak vun de Tuareg afleit hett. In düsse Spraak Tamascheq gifft dat den Begreep gher n gheren, wat soveel bedüden deit as de Strööm ehr Stroom. Twee Länner in Westafrika hefft jem ehren Naamen vun düssen Stroom hernahmen: De Republik Niger un Nigeria. In de verscheeden Spraken, de ründ um düssen Stroom to snackt weert, hett de Niger verscheeden Naamen, dormank Joliba in de Manding-Spraak un Isa-Ber (grote Stroom) in de Spraak Songhai.