New World

New World weer en austraalsch Soft-Pop-Band, deren gröttste Hit, Tom Tom Turnaround, 1971 herutbrocht wurr.

Bandhistorie[ännern | Bornkood ännern]

De Grupp wurr 1965 vun den Briten John "Fuzzy" Lee (* 9. März 1944 in Ashtead) un den Australier Mel Noonan (* 10. November 1943 in Sydney as Melvin J. Noone) grünnd. 1968 keem as dart Mann de Schott John Kane (* 18. April 1946 in Glasgow) dorto. In Australien weern se bald en vun de bekanntsten Bands.

Anfang vun de 1970er Johre hemm de Songwriter Nicky Chinn un Mike Chapman de Grupp in’t Feernsehn sehn, hemm se nah Europa haalt un hemm Kuntakt to den Plattenboss Mickie Most herstellt. De hett de Band glieks för sien Plattenlabel RAK Records anhüert.

Hör eerst Wark, Rose Garden, keem 1971 all up Platz 15 in Grootbritannien. Allerdings wurr to den sülvigen Tietpunkt en Version vun dat Leed mit de Country-Singersche Lynn Anderson herutbrcht – un de lann up Platz 1 vun völ internatschonaler Hitparaden.

De gröttste Hit vun New World wurr denn aber in dat sülvig Johr Tom Tom Turnaround, de dat up Platz 6 in Grootbritannien un up Platz 10 in Düütschland broch. Kara, Kara, ebenfalls 1971, weer denn all nich mehr so spoodriek un keem in Grootbritannien up Platz 17 un in Düütschland up Platz 31. Beid Titel weern in düütsch Faaten mit den Singer Peter Orloff spoodriek (Cora, komm nach Haus bzw. Immer wenn ich Josy seh’). Ok New World broch 1971 en Faaten vun Kara Kara mit düütschen Text herut.^[1]

1972 keemen se mit Sister Jane aber denn doch noch mal up Platz 9 in England. In dat sülvig Johr hemm se ok Living Next Door to Alice upnommen, dat aber ahn Spood bleev. 1976 wurr dat Leed nee upleggt, ditmal mit Smokie, un wurr en Welthit.

New World hett toletzt 1976 noch wat herutbrocht. Dornah hett man vun de Grupp nichts mehr hörrt.