Neestwüschenwand
De Neestwüschenwand (latiensch Septum nasi) is de Wand, de twischen de twee Nüstern in de Nees liggt. To de Neestwüschenwand höört Binngeweev (Pars membranacea), Gnuus (Cartilago septum nasi), wat Knaken von’t Seevbeen (Lamina perpendicularis ossis ethmoidalis) un wat Knaken von’t Vomer. Vörn in de Neestwüschenwand is en Nett ut lütte Bloodfatten, de Locus Kiesselbachi.
To’n Na-Achtern-Trecken von de Neestwüschenwand warrt de Muskel Musculus depressor septi nasi bruukt. De Nerven, de na de Neestwüschenwand föhrt, sünd de Nervus nasopalatinus un de Nervus ethmoidalis anterior. An Slagadern gaht na Neestwüschenwand de Arteria ethmoidalis anterior, de Arteria ethmoidalis posterior, de Arteria sphenopalatina, de Arteria palatina major un en Twieg von de Arteria labialis superior.
Bi’n Övergang twüschen Gnuus un Vomer is de Neestwüschenwand wat dicker, wat bi Vullwussene fakener bi’t Lufthalen dör de Nees stören kann. De Neestwüschenwand liggt in en knökern Rill von’n Keevknaken.
Wenn dat in de Neestwüschenwand rinblött, to’n Bispeel bi en braken Nees, denn billt sik en Neestwüschenwand-Bloodbuul. Bi en Slag op de Nees kann ok de Gnuus von de Neestwüschenwand ut de knökern Rill utglippsen (Subluxation). Dat Bruken von Drogen so as Kokain, welk Krankheiten un en poor annere Oorsaken köönt to en Lock in de Neestwüschenwand föhren.
Wenn de Neestwüschenwand nich nipp in de Midd liggt, denn is dat en Septumdeviation (krumme Neestwüschenwand). Dat kummt fakener vör un kann bi’t Lufthalen stören un Snurken oder Neesblöden utlösen oder slimmer maken. En Operatschoon (Septumplastik) is vandaag keen grote Saak mehr un geiht ok recht gau.
As Smuck warrt fakener dör de Neestwüschenwand en Lock staken un en Neesring dragen.