Naturgesett Partei
De Naturgesett Partei (offiziell: NATURGESETZ Partei, Aufbruch zu neuem Bewusstsein) weer en Lüttpartei in Düütschland, de 1992 grünnt weer un bit 2004 Bestand harr.
Programm
[ännern | Bornkood ännern]De Naturgesett Partei wull en Politik opboen, de dat Verstahn vun de Naturgesetten mit Hülp vun Tranzendentale Meditatschoon (TM) ünnerstütten schüll. Bito schülln de Prinzipien vun de TM in de Politik opnahmen warrn. De Partei harr na egen Utseggen dat Teel 10.000 Straafanzeigen gegen Politikers to stellen. Dormit wull se jem för jemehr vörgeevliche Mitschuld an „Verbreken“ un „Gesundheitsschadens“ as Naklapp vun’t Ignoreren vun de vörslahn Bewusstwesentechniken (as de TM) to Verantwoortung tehn. 1.500 Anzeigen sünd an’t Enn dorbi rutkamen, ünner annern ok gegen den Bundskanzler. Se weern aver vun de Staatsafkaatschop Berlin as gegendstandslos torüchwiest.
Na de vun Maharishi Mahesh Yogi verkünnte Lehr wull de Partei de Kosten för de Gesundheit üm mehr as 50 % minnern un in vele annere Rebden ok Lösungen anbeden. Butendem hett de Naturgesett Partei dat Inföhren vun’n Euro aflehnt jüst so as gentechnische Ännern vör allen bi Levensmiddels.
Bekannt worrn is de Partei sünners ok dör „Yogische Flegers“. De hebbt vertellt, dat se een Levitatschoonstechnik utföhrn deen, de vun den Yoga-Grünner Maharishi Patanjali al vör Johrdusende in de so nöömten Yoga-Sutras ansnackt harr. Sowiet dat vun buten to sehn weer, segen de Sprüng, de to in’n Lotussitt utföhrt warrt, to Anfang eher en Poggenstohlsprung. De dat utöövt hebbt, menen aver, dat dat egentlich wichtige nich dat Hüppen weer, man de geistige Aktivität un ehr Utwirken op dat Nervensystem un op de Ümgegend.
Entwickeln
[ännern | Bornkood ännern]Dat hett keen Wahl geven, bi de de Partei en Mandat winnen künn. Op en Bundsversammeln in’t Johr 2001 hett de Partei denn beslaten, dat se nich mehr bi Wahl deelnehmen wull. In de Johren 2003 un 2004 hebbt sik de Naturgesett Partein ründ üm de Welt wedder oplööst.
Wahlresultaten
[ännern | Bornkood ännern]- Bundsdagswahl 1994: 0,155 %, 1998 0,1 %
- Europawahl 1994: 0,3 %, 1999 0,1 %
Landdagswahlen
[ännern | Bornkood ännern]- Saarland: 1994 0,2 %
- Baden-Württemberg: 1996 0,1 %
- Bayern: 1994 0,1 %; 1998 0,1 %
- Berlin: 1995 0,3 %; 1999 0,2 %
- Bremen: 1995 0,1 %; 1999 0,2 %
- Hamborg: 1993 0,2 %; 1997 0,1 %
- Hessen: 1995 0,2 %; 1999 0,1 %
- Mekelnborg-Vörpommern: 1994 0,2 %
- Nordrhien-Westfalen: 1995 0,2 %; 2000 0,0 %
- Rhienland-Palz: 1996 0,3 %