Mosteiros (Kap Verde)

Vun Wikipedia
Wesseln na: Navigatschoon, Söök
Mosteiros (Oortsdeel Igreja) vun de Bargflank bekeken

Mosteiros (op Creolo: Musteru, op plattdüütsch do veel as „Kloosters“) is de Hööftstadt vun de Gemeen (Concelho) Mosteiros op dat Eiland Fogo in de Republiek Kap Verde. Se is togliek de tweetgröttste Stadt vun’t hele Eiland.

Geografie[ännern | Bornkood ännern]

Praça do Entroncamento
Morgenstünn in Mosteiros

De Oort Mosteiros liggt in’n Noordoosten vun’t Eiland Fogo twüschen de Küst vun’n Atlantik un de pielen Flank vun’n Vulkan Pico de Fogo, de binnen de wietrüümigen Caldera-Struktur Chã das Caldeiras liggt. De Oort deelt sik in verscheden Delen, wobi de hüütige Sitt vun de Verwalten in’n Middelpunkt vun’n Oort, in’n Deel Igreja („Kark“) to finnen is. De Karn vun Irgreja is de Praça do Entroncamento, en Platz mit veel Planten un Blomen, üm den sik blangen de Verwalten ok de Post, de Spoorkass, en Pension, dat Gesundheitszentrum und eenige Bars ansammelt hebbt[1].

Hinkamen kann een na den Oort över de ünnere Ringstraat, de dat Eiland Fogo eenmol dicht an de Küst ümrunnen deit. In’n Noorden vun Mosteiros leegt an disse Straat de ünner annern de Öörd Laranjo un Fajãzinha. In’n Süden slutt sik Fonsaco an un noch wieter süüdlich de Dörper Corvo, Achade Grande un Relva. En annern Weg na Mosteiros föhrt vun’n Süüden över en Sandpist dör de Chã das Caldeiras. An dissen Weg leegt in’n Süüdwesten vun Mosteiros de Dörper Feijoal un Pai Antonio[2].

Weertschop[ännern | Bornkood ännern]

Ruchweg 96 % vun de arbeiden Inwahners verdeent sik jemehrn Ünnerholt in de Landweertschop. In de Neeg vun Mosteiros an de Bargflank twüschen 300 un 1.000 m Hööch gifft dat en grote Tall vun Kaffeeplataaschen. Wo groot de Oorn is, hangt aver dorvun af, woveel Regen fallt. Café do Fogo warrt in vele Ladens ok buten vun Fogo as Spezialität vun’t Land anboden. Sien Smack warrt acht un mitünner warrt de Fogo-Kaffee ok to’n vereddeln vun slechtere Sorten nahmen.

De Entwicklung vun de Weertschop hett allgemeen dorünner leden, dat de Flaaghaven vun Mosteiros, de nipp un nau twüschen de Öörd Fajãzinha un Laranjos liggt, dicht maakt worrn is. Dat hett ok Utwirken op de Entwickeln vun de Stadt sülvst hatt, weer aver ut Sekerheitsgrünnen nödig.

Borns[ännern | Bornkood ännern]

  1. Pitt Reitmeier & Luceta Fortes: Cabo Verde, Kapverdische Inseln, Reise Know-How Verlag Peter Rump GmbH, Builefeld, 5. Oplaag, 2009, ISBN 9-783831-717712
  2. Landkoort Fogo Brava 1:60.000, Attila-Bertalen-Kartenverlag, Karlsruhe, 2002, ISBN 3-934262-03-1


Koordinaten:15° 2′ N, 24° 20′ W