Moorriem

De ole Landschup Moorriem liggt noordoostlich von Ollnborg twüschen de hoge Masch in'n Oosten un dat Hoochmoor in’n Westen. Twölf lütte Dörpen reegt sik hier an de Straat von Moorhusen bit na Neenbrook an’nanner. Well hier döörföhrt, den gefallt de Fachwarkhüüs mit de Reetdacken un de smucken Vörgaarns, aver he ahnt, dat dat hier fröher ene armselige Gegend weer. De Bewahners harrn ehre grode Noot mit dat vele Water. Jeden Harfst un Winter woorn ehre Feller un Weiden överswemmt. Faken kunnen se nich maal froh genoog de ganze Arnte bargen. Darto keem de ungünstige Form von de Bedrieven, de sik as smale Handdöker von’n Heiddiek na’n Kleidiek in ene Längde von acht Kilometer un ene Brede von 30 bit 50 m hentrucken. Dat Ackerland leeg wiet von'n Hoff weg up dat Hoochmoor oder up de Duwockflagen in’e Masch. Siet ungefähr veertig Jahr sünd de Moorriemer darbi, dat Land anners uptodelen, faste Wege to boon un togliek en Nett von Vörfluters antoleggen, so dat dat Water in de Werser aflopen kann.

De Gemeende Moorriem hett sik 1974 mit de Stadtgemeende Elsfleth vereenigt.