Mikołaj z Wilkowiecka

Vun Wikipedia

Mikołaj z Wilkowiecka (* 1524; † 1601 in Wieluń) weer en poolschen Paulinermönk un Schriever.

Över de fröhe Tied von Mikołaj z Wilkowiecka is nix bekannt. Nich woneem he Theologie studeert hett un ok nich woneem un wannehr he ordineert worrn is. 1563 weer he Preddiger an dat Paulinerklooster op’n Skałkabarg in Krakau. Von 1566 af an hett he in Tschenstochau leevt un weer hier von 1579 af an Abt von dat Klooster von Jasna Góra. Üm 1580 is he Provinzial von’n Paulinerorden för Polen worrn. He is 1601 in dat Paulinerklooster von Wieluń doodbleven.

Mikołaj z Wilkowiecka hett sik as Schriever von hagiograafsche Schriften un Preddigten vördaan. He gellt as Autor von de Historyja o chwalebnym Zmartwychstaniu Pańskim (Geschicht von dat herrliche Opstahn von uns Herrn), de op middelöllerliche Mysterienspelen baseert. Düt Wark is 1580–1582 in Krakau rutkamen. Nich kloor is, wat he dat Wark sülvs schreven hett oder dat blots bearbeidt un rutgeven hett. In dat 20. Johrhunnert is dat Wark von Leon Schiller wedder opdeckt un 1923 in Warschau op de Bühn bröcht worrn. En Adaptschoon von Kazimierz Dejmek is in de Johren 1960 un 1970 mehrmaals opföhrt worrn.