Mestiez

Mestizen up en Bild ut de Koloniaaltied: De español e india, produce mestizo (En Spanier un en Indianersche produzeert en Mestizen).

Dat Woort Mestiez (Franzöös'sch: Métis, Portugees'sch: Mestiço, Spaansch: mestizo, Engelsch: Mestee ut laat Latiensch: mixticius Mischling) warrt up Platt bruukt för de Kinner vun Witten un de Indigenen Völker, sunnerlich in Süüd- un Middelamerika. Dat Woort kummt ut de Romaanschen Spraken un is upkamen in de Tied vun den Kolonialismus. In verschedene Länner warrt düt Woort hüdigendags ganz unnerscheedlich bruukt.

In Süüdamerika, wenn dor Spaansch snackt warrt

Porfirio Díaz, Präsident vun Mexiko vun 1876–1880,stamm vun Europäers un Indianers af

In dat Kastensystem vun Latienamerika in de Koloniaaltied, sünd toeerst Kinner, vun de een Öllerndeel ut Europa afstamm un de annere en Indianer weer, mestizo nömmt wurrn. Ok Kinner, de ehre beiden Öllern Mestizen ween sünd, hefft düssen Naam afkregen. Kinner mit en gröttern Andeel an Indianers oder Europäers hefft dormols noch wedder annere Naam kregen, as castizo, cuarterón de indio un cholo. Hüdigendags weert all Minschen mit europääsche un indiaansche Vörwesers „Mestizen“ nömmt. Dat gifft avers ok Gemarken, wo düsse Naam as Schanne ankeken warrt. Annere bruukt wedder den Naam ok för sik sülms. För Minschen, de afrikaansche un europääsche Öllern hefft, warrt de Naam „Mulatte“ oder „morena“ (Froenslüde) oder „moreno“ (Mannslüde) bruukt.

Brasilien

In Brasilien warrt dat Woort mestiço allgemeen bruukt för Minschen, de ehre Öllern vun verscheden Rassen kaamt, also ok för de, de annerwegens „Mulatten“ heten doot. Ehr Andeel an de Inwahnertahl warrt för dat Johr 2007 mit 38,5 % angeven..Minschen, de vun Indianers un Europäers afstammen doot, heet in Brasilien caboclos oder en beten öllerhaftig mamelucos. Wenn se vun Afrikaners un Indianers afstammt, heet se cafuso.