Mercosur

Mercosur

Flagg vun den Mercosur

Mercosur 2005

Mercosur (spaansch Utspraak ˌmeɾ.ko.ˈsuɾ) is de afkört Beteken för den Gemeensamen Markt in Süüdamerika. De spaansch Bedüüden för de Afkörten is Mercado Común del Sur (Gemeensam Markt vun den Süüden). De jüst so offiziell portugiesch Beteken is Mercosul för Mercado Comum do Sul, un in dat in Paraguay snackt Guaraní is Ñemby Ñemuha de begäng Beteken.

De Mercosur is dör dat Ünnerteken vun den Verdrag vun Asunción van‘ 26. März 1991 tostannen kommen. Dat hannelt sück um en Binnenmarkt mit mehr as 260 Millionen Minschen (Stand 2006), de to Tiet 12,8 Millionen Quadratkilometer umfaat, wat ungefähr 72 % vun de Flach vun Süüdamerika bzw. 56 % vun de Flach vun Latienamerika is. De Mercosur schafft en Bruttoinlandsprodukt vun etwa 1 Billion US-Dollar (rund 75 Perzent vun dat gesamt BIP vun den latienamerikaanschen Kontinent), in’ Butenhannel bedrocht de Weert vun de Exporte üm 200 Mrd. US-Dollar un de för Importe ruchweg 130 Mrd. Dollar.

Liddmaatstaaten un eng ansloten Staaten

Liddmaaten vun den Mercosur sünd:

• Argentinien
• Brasilien
• Paraguay
• Uruguay
• Venezuela (hett an' 4. Juli 2006 den Biträe ünnerschreven un is an' 31. Juli 2012 up den Gipfel in Rio den Mercosur bitreden) siet 5. August 2017 düersam suspendeert)

eng anslooten (assozieert) Staaten sünd:

• Chile (1996)
• Bolivien (1997; hett en Andrag up Vullliddmaatschap stellt)
• Peru (2003)
• Kolumbien (2004)
• Ecuador (2004; hett in' Dezember 2011 Andrag up Vullliddmaatschap stellt)
• Suriname (2015; Verdrääg mooden noch ratifizeert wurrn)

Mit Mexiko nehm der Mercosur an’ 8. Juli 2004 Verhanneln över en Assoziatschoon up.

Bolivien hett, sietdem Evo Morales dor Präsident is (Anfang 2006), mehrfack Interesse an en Vullliddmaatschap bekund. Dat dat tostannen kummt hangt aber dorvan af, of de Andengemeenschap (CAN) wiederhen bestahn blifft, to’n annern aber ok van den Utgang vun en Konflikt mit Brasilien, de mit de Verstaatlichung vun de Gas- un Öölförderung in dit Land tosamenhangt.

In’ Gegensatz dorto hett Uruguay 2006 in’ Tosamenhang mit de Striedereen mit Argentinien um den Bau vun Zelluloosfabriken de egen Liddmaatschap in Fraag stellt. Dat Land sütt sück dör de Statuten vun den Mercosur in sien Hannelsspeelruum vör allen in’ Henblick up unafhängig Freehannelsafkamen mit anner Länner inschränkt.

Liddmaten vun den Mercosur könn nah dat Protocolo de Ushuaia sobre Compromiso Democrático (Protokoll vun Ushuaia över de Demokratie) blots demokraatsch Staaten wurrn. Disse Regelung sall verhinnern, dat de latienamerikaansch Länner weer torüch in de Diktatuur fallen.

De eenheitlich blau Päss vun de Liddmaatstaaten drocht – jüst so as de Schrifttoog in de Liddmaatstaaten vun de EU – över de Naam vun den Staat den Schrifttoog „Mercosur“, up brasiliaansch Päss „Mercosul“.

Teelen

De Teelen vun den Mercosur finnen sück in de Präambel vun den Verdrag vun Asunción. De Verdrag nennt as Telen vun den weertschaplichen un politischen Integratschoonsprozess:

1. de Vergröttern vun de natschonale Märkte vun de Liddmaatstaaten as grundsätzlich Bedingung to de flinker maken vun de wertschaplichen Entwickelnsperzessen ünner Berücksichtigung vun de sozialen Gerechtigkeit; dit sall ünner Beachtung vun den Schuul vun de Umwelt as ok dör dat Verbetern vun de Infrastruktur tüschen de Liddmaatstaaten, dör de Koordination vun makroökonoomsch Politiken un dör de Ergänzung vun sektoral Politiken henkreegen wurrn;
2. en adäquate Inbinnen vun de Liddmaatstaaten in dat internatschonal Gefüge vun de groot Wertschapsblocken;
3. de Förderung vun de wetenschaplich un technisch Entwickeln vun de Liddmaatstaaten (dordör sall en Verbetern vun dat Anbott un de Gööd vun de Göder un Deenstleistungen un somit de Verbetern vun de Levensbedingungen henkregen wurrn) un
4. de Entwickeln to en immer mehr umfaaten Union tüschen de Völker.

Disse Teelen sullen luut Art. 1 vun den Verdrag vun Asunción dör’t Inrichten vun en gemeensamen Markt bit to’n 31. Dezember 1994 reckt wurrn, de disse Egenschapen upwiest:

• den fre’en Verkehr vun Göder, Deenstleistungen un Produktschoonsfaktoren tüschen de Liddmaatstaaten; ünner annern dör dat Afschaffen vun Toll, nich-tarifären Hannelshinnern un jeedeen anner Maatnahmen mit glieker Wirken:
• de Inrichten vun en gemeensamen Butentoll un dat Fastleggen vun en gemeensam Hannelspolitik tegenöver Dartstaaten oder Gruppen vun Staaten un de Koordineeren vun de Positschonen in regionalen un internatschonalen Weertschapsforen;
• de Koordinatschoon vun de makroökonoomschen un sektoralen Politiken tüschen de Liddmaatstaaten, dorto hörrn: de Butenhannelspolitik, de Agrarpolitik, de Industriepolitik, de Fiskal-, Geld-, Wesselkurs-, un Kapitalmarktpolitik, de Deenstleistenspolitik, de Tollpolitik, de Verkehrspolitik, de Kommunikatschoonspolitik un anner Feller, up de man sück eenigt, um akkerate Bedingungen för den Wettstriet tüschen de Liddmaatstaaten to maken; un
• de Tosaag vun de Liddmaatstaaten, hör Gesettgeven in de bedrapen Rebeden upnanner aftostimmen, um den Integratschonsperzess starker to maken.

Nadem de Entwicklung vun den Mercosur Enn’ vun de 1990er Johren wat in’t Stocken keem, wurr 2000 vun de Liddmaatstaaten en as „Relanzamiento del Mercosur“ (Neestart vun den Mercosur) betekent ne’e Deelstreck vun de regional Integratschoon op’n Weg bröcht. De harr nu dat Teel, de Tollunion nah binnen un nah buten starker to maken.

De Regeeren vun de Liddmaatstaaten hemm dorum de Konvergenz un Koordinatschoon vun de Makroökonomie ünnerstreken. So will man en nahollend Fiskal- un monetäre Politik henkriegen, um de Pries stabil to hollen un dat to garanteeren.

Wiederhen sall sück de Mercosur nah dissen Neestart mit disse Deelrebeden intensiv befaaten:

• Togang to de Markten
• Tollaffertigen flinker to maken
• Dorför sörgen, dat Investitschoon, Produkschoon un Utfuhr beter wurrn
• Gemeensam Tolltarif
• Wettstiretsrecht
• Lösen vun Striedereen
• Umsetten vun dat Mercosur-Recht in de Liddmaatstaaten
• Institutschonelle Struktur starker maken
• Butenverbinnen

Problemen vun dat Fastigen

In’ Tosamenhang mit de Vergröttern un Fastigen vun den Staatenbund gifft dat en ganzen Hopen vun Problemen, de disse beid Perzessen behinnern.

• Eenmal gifft dat de traditschonellen Rivalitäten, as to’n Bispeel tüschen Brasilien un Argentinien (de breckt ok bi de Diskussion um de Reform vun de Vereente Natschonen weer up) oder ok tüschen Chile un Bolivien (Togang to’n Pazifik, Salpeterkrieg).
• Wiederhen gifft dat in den Mercosur in’ Gegensatz to de EU mit Brasilien en Land, dat wegen sien Grött de annern domineeren kunn. Dat makt dat sworer, de Utwirken vun de baven nömmt Rivalität mit Argentinien to minnern.
• En Hööftkonfliktpunkt is to Tiet de fehlen Strategie in’n Ümgang mit de USA (FTAA), de siet de Vullliddmaatschap vun Venezuela – villicht laterhen ok vun Bolivien – noch starker wurrn kann.
• Liddmaaten vun den Mercosur is dat ünnerseggt, mit Dartstaaten bilateraal Freehannelsafkamen aftosluten. Dat föhrt in Uruguay un Paraguay dorto, dat de beid överleggt, ut den Staatenbund weer uttotreden.

Organen

De Organen vun den Mercosur

De Verdrag vun Asunción van 1991 hett blots twee Organen kenn un jemehr Funkschonen wiels de Övergangstiet to’n gemeensamen Markt man blots bannig unscharp verkloort. Dat harr den Vördeel, dat man sück an kien stief Strukturen hollen muss, wat en andüern Entwickeln vun den Integratschoonsperzess eenfacker maken dee. Dat Protokoll vun Ouro Preto van 1994 hett de institutschonell Struktur vun den Mercosur so fastleggt, dat dat a) ne’e Organen inricht hett un b) hör Eegenschapen un Tostännigkeiten fastleggt hett. De Art. 1 vun dat Protokoll vun Ouro Preto nennt as Organen vun den Mercosur:

• El Consejo del Mercado Común (CMC)
• El Grupo Mercado Común (GMC)
• La Comisión de Comercio del Mercosur (CCM)
• La Comisión Parlamentaria Conjunta (CPC)
• El Foro Consultivo Económico-Social (FCES)
• La Secretaría Administrativa del Mercosur (SAM)

(Vgl. Afbillen 1)

• Tribunal Permanente de Revisión del Mercosur (siet 2004)
• Parlament vun den Mercosur (7. Mai 2007)

De eersten beid Organen un dat Sekretariat gifft dat all, siet dem de Verdrag ünnerschreven wurr. Dat Sekretariat harr in den Verdrag vun Asunción noch nich den Status vun en Organ, man weer en de GMC toordent Verwaltensnevenorgan.

Nich in’ Verdrag vun Asunción un ok nich in dat Protokoll vun Ouro Preto finnen sück de Mercosur-Drapen. De Drapen sünd halfjohrig Drapen vun de Präsidenten vun de Mercosur-Staaten, de to glieker Tiet mit de Sitzungen vun den CMC stattfinnen. De Drapen sünd ut en politisch Initiative entstahn un bestaht siether dör Wennst wieder. In Art. 6 vun dat Protokoll vun Ouro Preto find sück somit ok de eenzig Henwies up de Drapen.

Historie vun den Mercosur

• 1991, 26. März: De Verdrag vun Asunción wurrd ünnerschreven
• 1991, 17. Dezember: Dat Protokoll vun Brasília (System to dat Lösen vun Meenungsverscheedenheiten) wurrd ünnerschreven
• 1994, August: Ünnerteken vun dat Protokoll vun Buenos Aires
• 1994, 9. Dezember: Ünnerteken vun dat Protokoll vun Ouro Preto (institutschonell Struktur vun den Mercosur)
• 1995, 7. Dezember: Verafscheeden vun dat Programm Mercosur 2000 (Aktschoonsprogramm)
• 1995, 15. Dezember: Ünnerteken vun en Rahmenafkommen mit de Europäisch Union
• 1996, 25. Juni: Ünnerteken vun dat Assoziatschonsafkommen mit Chile
• 1997: Ünnerteken vun dat Assoziatschonsafkommen mit Bolivien
• 1998, 24. Juli: Dat Protokoll vun Ushuaia (Plicht to Deokartie in’ Mercosur)
• 2000, 15. Dezember: Präsidiale Verkloren över de fundamental Rechten vun de Verbruker in’ Merrcosur (Declaración Presidencial de Derechos Fundamentales de los Consumidores del Mercosur)
• 2001, 22. Juni: Rahmenafkommen över de Umwelt
• 2002, 18. Februar: Ünnerteken vun dat Protokoll vun Olivos (System to dat Lösen vun Meenungsverscheedenheiten)
• 2003, 26. August: Ünnerteken vun dat Assoziatschonsafkommen mit Peru
• 2003, 15. Dezember: Akschoonsprogramm 2004-2006
• 2003, 16. Dezember: Ünnerteken vun en Freehannelsafkommen tüschen den Mercosur un de Andengemeenschap. De Freehannelszoon sall af 1. Juli 2004 gellen.
• 2005, 9. Dezember: Venezuela kriggt Beobachterstatus ahn Stimmrecht.
• 2006, 4. Juli: Venezuela ünnertekent den Biträe to’n Mercosur. De Ratifizeeren dör de Parlamente vun Brasilien un Paraguays steiht in’ September 2010 aber immer noch ut.
• 2007, 7. Mai: eerste Sitzung vun dat Parlament vun den Mercosur.
• 2007, 22. Mai: Up en Drapen vun de Mercosur-Staaten, Bolivien un Ecuador in Paraguay wurr de Grünnen vun en vun de IWF un Weltbank unafhängig Bank vun den Süüden beslooten. De Verdrag wurr bit September 2010 nich vun de Parlamente vun all Liddmaatstaaten genehmigt.
• 2010, 2. August: De Ministerrat vun den Mercosur beslutt en Institut för Minschenrechte to schaffen. Seet vun de Organisatschoon is die ehmalige Technikerschool vun de Marine vun Argentinien, de in de Tiet van 1976 bit 1983 as Geheimgefängnis un gröttst Folterzentrum vun dat Land deent hett.
• 2016, Dezember: Utsluss vun Venezuela.

Mercosur un FTAA

De Mercosur-Länner seecht sück as Gegenmacht to de USA in de Verhandlungen um en gesamtamerikaansch Freehannelszoon (FTAA). Tüschen de beid Blocken gifft dat dorbi düchtig Interessengegensatzen: Wiels de USA vör allen ünner de Clinton-Regeeren up gau Tollsenkungen drängt hett, woullen de latienamerikaansch Staaten doröver eerst in en letzten Träe verhanneln.

Mercosur un EU

De Mercosur un de Europääsche Union hebbt an’ 15. Dezember 1995 en Assoziatschoonsafkamen ünnertekent, dat en Vörstuuf to dat Ünnerteken vun en Freehannelsafkamen dorstellt. 2004 weer man in de Verhanneln över dat Freehannelsafkamen all temelk wiet kamen un man hett optmistisch dormit rekent, dat Ganze in Harvst 2004 to’n Afsluss to bringen. En groot Strietpunkt bleev aver de Togang to’n Europääschen Markt för Agrarprodukten ut de Mercosur-Länner. Siet 2004 wurrd blots noch up technisch Ebene verhannelt. Ännern deiht sück dat woll eerst, wenn de Doha-Runn vun de Welthannelsorganisatschoon (WTO) Spood hett. De Runn is aber to Tiet utsett.

Dat EU-Anbott an den Mercosur 2004 hett so utsehn:

	Quoten (in Tünn) na Afsluss vun de
Produkten	Mercosur-Verhanneln	WTO-Verhanneln
Bioethanol	500.000	500.000
Mais	400.000	300.000
Weeten	100.000	100.000
Rindfleesch vun hooch Qualität	50.000	50.000
Geflügelprodukte	37.500	37.500
Schwienfleesch	6.000	6.000
Bananen	30.000	0
Melkpulver	6.500	6.500
Kääs	10.000	10.000
Ries	20.000	20.000

Born: Europääsche Kommisschoon

De Mercosur-Länner weern mit dissen Vörslag aver bi wieden noch nich tofräe. Dat EU-Abott weer an Bedingungen knütt. So sullen de Mercosur-Liddmaatstaaten binnen teihn Johr den Toll för meest all Industrieprodukten afschaffen. De Toll up Produkten, deren Toll all ünner 4% liggt, sull sofort afschafft wurrn.

Literatur

• Samuel A. Arieti: The Role of MERCOSUR as a Vehicle for Latin American Integration, in: Chicago Journal of International Law 6 (2005/2006) S. 761-773.
• Susanne Gratius: Mercosur – Gravitationszentrum in Südamerika? In: Bodemer/Gratius (Hrsg.): Lateinamerika im internationalen System. Zwischen Regionalismus und Globalisierung. Opladen 2003, ISBN 3-8100-4025-8
• Silvia Hunger: Die Freihandelszone zwischen Mercosur und EU. Eine von Hindernissen geprägte Kooperation. Saarbrücken 2008, ISBN 978-3-639-09555-5
• Wolfram Klein: Der Mercosur. Wirtschaftliche Integration, Unternehmer und Gewerkschaften. Freiburg 1996, ISBN 3-928597-18-3
• Ingo Malcher: Der Mercosur in der Weltökonomie. Eine periphere Handelsgemeinschaft in der neoliberalen Globalisierung. Baden-Baden 2005, ISBN 3-8329-1266-5
• Marcos Augusto Maliska: Die Supranationalität in Mercosul. Die Übertragung von Hoheitsrechten und das Problem der demokratischen Legitimität. In: Jahrbuch des Öffentlichen Rechts der Gegenwart, Neue Folge / Bd. 56, 2008, S. 639-654.
• Marcel Vaillant: Mercosur. Southern Integration under Construction. In: Internationale Politik und Gesellschaft. Heft 2, 2005. ISSN 0945-2419
• Ulrich Wehner: Der Mercosur. Rechtsfragen und Funktionsfähigkeit eines neuartigen Integrationsprojektes und die Erfolgsaussichten der interregionalen Kooperation mit der Europäischen Union. Baden-Baden 1999, ISBN 3-7890-6026-7
• Danilo Zimbres: The Mercosur after the return to democracy: a social constructivist approach to understanding the formation of MERCOSUR In: Diplomacia.biz.

Weblenken

Mercosur. Mehr Biller, Videos oder Audiodateien to’t Thema gifft dat bi Wikimedia Commons.

• Offizielle Seite des Mercosur (spaansch un portugiesch)
• Red Académica Uruguaya: MERCOSUR (spaansch)
• Außenbeziehung der EU zum Mercosur (engelsch)
• Handelsbeziehungen EU-Mercosur (Engelsch mit mehrspraakig „News-Links“)
• Kein Auslaufmodell: 20 Jahre Mercosur (GIGA Focus 3/2011)