Max Morlock

Maximilian Wilhelm „Max/Maxl“ Morlock (* 11. Mai 1925 in Nürnbarg-Gleißhammer; † 10. September 1994 in Nürnbarg) weer en düütsch Footballspeler. He wurr ünner annern 1954 Weltmeester un tweemal Düütsch Meester.

Karriere

In’ Vereen

In de Jöögd speel Morlock as Butenlöper för Eintracht Nürnberg. In’ April 1940 wunn disse Mannschap mit 4:2 gegen den 1. FC Nürnberg, ansluutend is Morlock to’n 1. FC Nürnberg wessel, wiel sien Talent dor upfullen weer. Hier veränner sück sien Rull vun’ Butenlöper to’n Störmer.

Van 1940 bit 1964 speel Morlock för den 1. FC Nürnberg. He hett dorbi in rund 700 Spelen rund 900 Doren för den Club schaaten. Mit den Vereen wurr he denn ok 1948 un 1961 düütsch Footballmeester. Mit 38 Johr keem he ok noch in de eerst Bundsliga-Saison 1963/64 to’n Insatz. In 21 Spelen keem he dorbi noch up 8 Doren.

In de Natschonalmannschap

1950 keem he to’n eersten Mal in de düütsch Natschonalmannschap to’n Insatz. Sie gröttste Spood weer dorbi de Gewinn vun de Football-Weltmeesterschap 1954. All tosommen hett he van 1950 bit 1958 26 Lännerspelen maakt un dorbi 21 Doren schaaten. To de Weltmeesterschap 1958 hörr he aber nich mehr to’n Kader.

Ehrungen

• 1961 wurr he to’n Footballer vun dat Johr wählt.
• 1995, nich mal een Johr nah sien Dood wurr de Platz för dat Stadion vun den 1. FC Nürnberg in „Max-Morlock-Platz“ nee nömmt.
• 2006 wurr ok noch en Tokiekerblock (Block 8) in dat Stadion nah hüm nömmt.
• 2008 wurr en Statue in Levensgrött fardigstellt, de blots vun de Fans betallt wurr. Dit Projekt is siet den 23. August 2008 vör de Noordkurve vun dat Stadion to sehn. Tovör harrn sück de Fans vun den 1. FC Nürnberg bi de Naamsännern vun dat Stadion ahn Spood för Max-Morlock-Stadion insett. Siet 2010 versöcht man dat aber wedder.
• De Priesfigur MAX, de de Düütsch Akademie för Football-Kultur siet 2007 an de Winner vun den Düütschen Football-Kulturpries vergifft, is nah hüm nömmt.

Privates

• Max Morlock weer verheiraadt un harr twee Döchter.
• He is an Krebs krank wurrn un doran storven. Max Morlock is up den St. Leonhard-Karkhoff in Nürnbarg bisett.

In de Kunst

In den Speelfilm Das Wunder von Bern ut dat Johr 2003 wurrd Max Morlock vun Tobias Hartmann dorstellt..

Literatur

• Walter Setzepfand: Max Morlock, 13, meine Glückszahl, Copress-Verl., München 1961
• Max Morlock: Maxl Morlock erzählt, Von der Schülerelf zur Weltmeisterschaft, Verlag der Süddeutschen Zeitung, 1955

Weblenken

• Max Morlock in de Datenbank vun Fußballdaten.de
• Max Morlock in de Datenbank vun Weltfußball.de
• DNB-Katalog
• Max Morlock bi Kicker-online