Martin Shaw (Schauspeler)

Martin Shaw (* 21. Januar 1945 in Birmingham) is en britischen Schauspeler. In Düütschland is he vör allen bekannt worrn dör sien Rull as Ray Doyle in de britischen Krimireeg The Professionals, de he twüschen 1977 un 1983 speelt hett.

Leven un Wark

Shaw hett an de London Academy of Music and Dramatic Art studeert un na sien Afsluss Rullen an’t Theater speelt, so as Look Back in Anger oder A Streetcar Named Desire. Sien eerste gröttere Rull in’t Feernsehn harr he as Hippie-Student Robert Croft in de britischen Feernsehreeg Coronation Street. 1971 speel he in Roman Polański sien Macbeth-Verfilmen den Banquo.

Vun 1977 bit 1983 harr he een vun de Hööftrullen in de Krimireeg The Professionals, dör de he weltberopen worrn is. He weer mit sien Rull as baldadigen Polizist nich so recht tofreden un hett sik to’n Bispeel ok gegen dat Dreihbook de Hoor lang wassen laten un keem faken in eenfacke Kledaasch to’n Dreihn. Teemlich fröh al wull he wedder torüch an’t Theater, so dat de Krimireeg al na veer Staffeln wedder to Enn weer.

Dorna hett he wedder vör allem an’t Theater speelt, keem aver Enn vun de 1990er Johren wedder torüch na’t Feernsehn. Na vele Johren stünn he 2005 mol wedder op de Bühne, ünner annern tosamen mit sien Dochter Sophie. 2006 keem he in de Titelrull vun de Gerichtsreeg Judge John Deed torüch na’t Feernsehn. vun 2009 an weer he in de BBC-Reeg Inspector George Gently to sehn, de in de 1960er Johren speelt.

Blangen de Schauspeleree hett Shaw ok an verschedene Höörböker mitarbeit, so an Warken vun Thomas Hardy, Oscar Wilde, Ken Follett oder J. R. R. Tolkien.

Shaw hett veermol heiraat un weer dreemol scheedt. Ut sien eerste Eh stammt sien dree Kinner Luke, Joe un Sophie, de ok all as Schauspelers arbeiten doot. Siet 2003 is he dat veerte mol verheiraat mit Karen De Silva.

Filmografie (Auswahl)

Johr	Titel	Synchroonsnacker
1967-68	Coronation Street, Feernsehreeg
1969	Doctor in the House, Feernsehreeg
1971	Macbeth
1973	Helen: A Woman of Today, Feernsehreeg
1973	The Golden Voyage of Sinbad dt.: Sindbads gefährliche Abenteuer	Tommi Piper
1975	Operation: Daybreak dt.: Das Sonderkommando
1980	Cream in My Coffee, Feernsehn
1982	East Lynne, Feernsehn
1977-83	The Professionals, Feernsehreeg dt.: Die Profis	Uwe Paulsen (1. Synchro) Ulf-Jürgen Wagner (VHS)
1983	The Hound of the Baskervilles dt.: Der Hund von Baskerville	Uwe Paulsen
1984	Facelift
1985	The Last Place on Earth, Feernseh-Minireeg dt.: Wettlauf zum Pol	Joachim Siebenschuh
1988	Intrigue, Feernsehn
1989	Cassidy, Feernsehn
1990	Ladder of Swords, Feernsehn
1990	The Investigation: Inside a Terrorist Bombing, Feernsehn dt.: Attentat in Birmingham
1993-95	The Chief, Feernsehreeg
1999-2002	Always and Everyone, Feernsehreeg
2005	The Iceman Murder, Feernsehn
2001-07	Judge John Deed, Feernsehreeg
2017	6 Days	Stefan Mehren
2007-17	Inspector George Gently dt.: George Gently – Der Unbestechliche	Hans-Werner Bussinger Jürgen Kluckert

Literatur

• Stafford Hildred & Tim Ewbank: Shaw: The Biography. London, 2006, ISBN 1-84454295-5
• Werner Schmitz: Die Profis. Auf den Spuren des CI5 – das große Buch zur Serie. Berlin, 2006, ISBN 3-89602-704-2

Weblenken

• Martin Shaw in de Internet Movie Database (engelsch)
• BBC Biografie (engelsch)