Martin Brüns

Vun Wikipedia
Zur Navigation springen Zur Suche springen

Martin Brüns (* 14. Mai 1911 in Achem; † 12. Oktober 1976 in Bremen) weer en düütschen Politiker von de SPD.

Brüns is 1911 in Achem boren un weer dor ok op de Volksschool. Na de School hett he en Lehr as Schriftsetter maakt. Nadem he veer Johr lang ahn Arbeid weer, hett he den Beroop wesselt un is Dreiher worrn. He hett denn teihn Johr in’n Schippbo in Bremen arbeidt. Na de Machtergreifung weer he na 1933 illegal in’n polietschen Wedderstand aktiv. Nadem de Twete Weltkrieg 1945 toenn weer, hett he in de Kommunalverwaltung von’n Landkreis Rodenborg anfungen.

Al 1925 is Brüns Maat von de Fre’e Gewerkschaft worrn un weer siet 1927 Funkschonär von de Sozialistische Arbeiderjugend. In de SPD is he 1930 ringahn.

Von 1946 bet 1952 weer he Parteisekretär von de SPD un weer Maat von’n ernannten un 1946 von’n wählten Gemeenraad von Bieren. Twee Johr later is he Maat von’n Kreisdag von’n Landkreis Veern worrn un in’n Januar 1959 Börgermeester in Bieren. Von April 1961 bet September 1968 weer he Viez-Landraad von’n Landkreis Veern.

Brüns weer von’n 20. April 1947 bet 20. Juni 1974 (eerste bet sövente Wahlperiood) Maat von’n Landdag von Neddersassen. He is in all de Tied as Direktkannedaat in’n Wahlkreis Achem-Veern wählt worrn. 1966 hett he dat Grote Verdeenstkrüüz von’n Verdeenstorden von de Bundsrepublik Düütschland kregen. He weer ok Dreger von dat Grote Verdeenstkrüüz von’n Neddersassischen Verdeenstorden.