Maria-Königin-Kark

De Maria-Königin-Kark weer en röömsch-kathoolsche Kark in Tarms. Se hett bi dat Dekanat Stood binnen dat Bisdom Hilmssen höört un weer na den Marientitel Maria Königin nöömt.

An de Timk-Kasern in Westertimk (so bi dree Kilometer von Tarms af) hett dat en kathoolsche Kapell geven, de al na Maria Königin nöömt ween is. Dor hett dat ok zivile Goddsdeensten geven. De Kapell is vondaag afreten. De Buntglasfinster ut de Kapell hebbt se in de Tarmser Kark wedder bruukt. Vondaag liggt op dat Gelänn von de Kasern, de 1993/1994 dichtmaakt hett, de Gewarvenpark Timk-Park.

Ut disse Kapell is denn de Kark in Tarms vörgahn. Dat weer en Filialkark von de Christ-König-Kark in Zeven. De Grundsteen is 1977 leggt worrn un an’n 8. April 1978 hett de Hilmsser Wiehbischop Heinrich Pachowiak de Kark inwieht. De Kark weer ut Fardigbo-Delen boot un harr en spitzen Toorn, de free stünn un baven en Krüüz op harr.

De letzte Goddsdeenst in de Kark weer an’n 25. September 1996. Na dat Profaneren is de Kark an en Privatperson verköfft worrn un warrt vondaag as Wahnhuus un Atelier bruukt. De nächsten kathoolschen Karken sünd nu de Maria-Freden-Kark in Worpsweed (so bi 14 Kilometer weg) un de Christ-König-Kark in Zeven (so bi 17 Kilometer weg).