Margrit Wetzel

Margrit Wetzel

Margrit Wetzel (* 8. April 1950 in Hamborg) is en düütsche Politikerin von de SPD.

Wetzel is 1950 as borene Brüggen in Hamborg boren. Na de Middlere Reife 1967 hett se en Lehr as Hotel- un Gaststedengehilfin in dat Hambörger Hotel „Vier Jahreszeiten“ maakt un hett dor denn as Inkoopsassistentin arbeidt. 1975 hett se en Studium an de Hoogschool för Weertschop un Politik in Hamborg maakt un dat 1978 as Volkswirtin afslaten. Se hett denn noch en Studium von de Philosophie, Psychologie un Soziologie an de Universität Hamborg maakt, dat se 1984 as Magister Artium (M.A.) afslaten hett. 1988 hett se denn ok noch en Dokterarbeid mit’n Titel Kriterien politischer Gerechtigkeit − zur Aktualität Kants schreven un en Doktertitel kregen.

Wetzel hett twee Kinner.

Wetzel is 1978 in de SPD ringahn un hett von 1985 bet 2000 to’n Vörstand von’n SPD-Ünnerbezirk Stood höört un weer dor von 1996 bet 2000 Vörsittersche.

1991 is se dat eerste Maal in’n Kreisdag von’n Landkreis Stood rinkamen.

Wetzel weer von 1990 bet 1994 dat eerste Maal un en tweet Maal von 1998 bet 2009 in’n Bundsdag. Se weer dor von 2002 bet 2005 Viez-Vörsittersche von’n Utschuss för Verkehr, Bo- un Wahnungswesen. Von 2005 bet 2009 weer se Lootsin von de SPD-Küstengang.

Wetzel is 1990 över de Landslist Neddersassen un siet 1998 as direkt wählt Afornte von’n Bundsdagswahlkreis Stood-Rodenborg I un siet 2002 von’n Bundsdagswahlkreis Stood-Cuxhoben in’n Bundsdag rinkamen. Bi de Bundsdagswahl 2005 hett se 48,1 % von de Eerststimmen kregen. In’n nee tosneden Bundsdagswahlkreis Stood I – Rodenborg II hett se bi de Bundsdagswahl 2009 mit 33,4 % von de Eerststimmen gegen Martina Krogmann von de CDU verloren un weer denn nich mehr in’n Bundsdag in.

Wetzel is de Präsidentin von de Düütsche Seemannsmission.