Marcin Giersz

Marcin Giersz oder Martin Gerß (* 23. Oktober 1808 in Kowalken; † 25. März 1895 in Lötzen) weer en masuurschen Schriever.

Giersz is 1808 in en luthersche Buurnfamilie in Kowalken (Masuren) boren. Dat Rebeed hett to de Tied to Prüßen höört, Giersz weer aver Maat von de masuursch-poolsche Minnerheit. He weer op dat Lehrerseminar Karalene un is denn von 1828 bet 1835 Kanter in Nikolaiken ween, 1835 bet 1838 Schoolmeester in Seehesten un 1838 bet 1848 Rekter in Groß Stürlack. 1848 hett he ut polietsche Grünn sien Arbeid as Schoolmeester opgeven un hett sik as Schriever in Lötzen dallaten. Dor weer he ok Stadtverorntenvörstaher.

Giersz hett sik för de masuursche Spraak un Kultur insett un hett sik in’n Kulturkampf twüschen Düütsche un Polen för en egenstännige masuursche Identität utspraken, de von Düütsche un Polen unafhängig is. Dormit hett he sik Kritik von de düütsche Överheit jüstso as von poolsche Kulturaktivisten inhannelt.

Von 1875 bet 1890 hett he jede Week (von 1890 bet 1892 all twee Weken) dat Bladd Gazeta Lecka rutgeven, in de he ünner annern Texten ut dat Düütsche un Poolsche in dat Masuursche överdragen hett. Dormit hett he bidragen, en egen masuursche Literatur op de Been to bringen. Von 1860 bet 1895 keem ok de Kalendarz Królewsko-Pruski Ewangelicki (Könglich-Prüüßsche Evangeelsche Klenner) rut, de sik an de Masuren richten dee. Giersz hett den Verein für Kunde Masurens grünnt.