Łupowo (Bogdaniec)

Vun Wikipedia
(wiederwiest vun Loppow)
Zur Navigation springen Zur Suche springen
Kark in Łupowo

Łupowo ([wu'pɔwɔ]) is en Dörp in de Gemeen Bogdaniec, Powiat Gorzowski, Woiwodschop Lebus, Polen. Binnen de Gemeen billt dat Dörp en Schultenamt. De Oort hett 859 Inwahners (Stand 2009).

Bet 1945 hett dat Dörp Loppow heten un to de Nümark tellt. Dat leeg in’n Kreis Landsberg (Warthe) in de Provinz Brannenborg von Preußen. De ole Dialekt weer dat nümärksche Plattdüütsch, de Spraakgrenz to dat middeldüütsch präägte Lausitzisch-Nümärksche weer aver blots en poor Kilometer weg. De Spraakgrenz lööp groff an de Warthe langs.

Geografie[ännern | Bornkood ännern]

De Naveröörd sünd Baczyna in’n Noorden, Chróścik, Wieprzyce (Gorzówer Deel) un Gorzów Wielkopolski in’n Noordoosten, Wieprzyce (Bogdaniecer Deel) in’n Süüdoosten, Lubczyno in’n Süden, Jenin un Bogdaniec in’n Süüdwesten un Stanowice un Racław in’n Noordwesten.

Dat Water flütt na de Warthe hen af, de good dree Kilometer in’n Oosten an Łupowo langsflütt. Dat Dörp liggt op’n Rand von dat högere Land na’n Warthebrook. De Beek Kling (hoochdüütsch Die Klinge, poolsch Łupica)) flütt in en eng Daal von dat Hoochland in’n Brook. Dor in’n Brook warrt dat Water över künstlich anleggte Gravens na de Warthe afföhrt.

Historie[ännern | Bornkood ännern]

De Oort kummt 1278 as Loppowe toeerst in de Oorkunnen vör. 1538 is de Reformatschoon in de Region inföhrt worrn. De eerste egen Kark hett Loppow 1778 kregen. Dat weer en Holtkark un en Filiaal von de Kark in Beyersdörp. Düsse Kark stünn bet 1909, as se afreten und de hüdige Steenkark boot worrn is. De ne’e Kark is von’n Architekt Oskar Hossfeld un in’n neobarocken Stil.

Nadem 1945, na’n Tweten Weltkrieg, de Düütschen ut de ganze Region flücht un verdreven worrn sünd, hebbt sik Polen in Loppow dallaten un dat Dörp Łupowo döfft. De evangeelsche Kark is 1946 as röömsch-kathoolsche Kark ümwieht worrn. Se is siet 1947 de Swarte Madonna von Tschenstochau (Matka Boska Częstochowska) wieht.

Loppow/Łupowo weer bet to’n 31. Dezember 1954 en egen Gemeen. To’n 1. Januar 1955 is de Gemeen oplööst worrn un Łupowo weer denn de Hauptoort von de Gromada Łupowo, de bet 1972 bestahn hett. To’n 1. Januar 1973 is de Oort denn Deel von de hüdige Gemeen Bogdaniec worrn. Von 1945 bet 1950 hett de Oort to de Woiwodschop Posen höört, von 1950 bet 1975 to de Woiwodschop Zielona Góra un von 1975 bet 1998 to de Woiwodschop Gorzów, bevör he mit dat Johr 1999 an de Woiwodschop Lebus kamen is.

Weertschop un Infrastruktur[ännern | Bornkood ännern]

Verkehr[ännern | Bornkood ännern]

De Droga wojewódzka 132 (DW 132) löppt dör Łupowo. Se föhrt in’n Süüdwesten na Witnica un in Kostrzyn nad Odrą an de Droga krajowa 31 un in’n Noordoosten na Gorzów Wielkopolski rin. Twüschen Łupowo un Wieprzyce is de DW 132 an de Droga krajowa 3 anslaten, de in’n Noordwesten na Stettin löppt un in’n Süüdoosten na Skwierzyna un Świebodzin.

Lüttjere Straten föhrt in’n Noordwesten na Racław un in’n Süden na Chwałowice.

De Oort liggt mit en egen Bahnhoff an de Bahnlien Tczew–Küstrin-Kietz Grenz. De Bahnlien is 1857 anleggt worrn, aver de egen Bahnhoff keem eerst 1894.

Scholen[ännern | Bornkood ännern]

De Kinner ut Łupowo gaht in Jenin na Grundschool un in Bogdaniec na Middelschool.

Lüüd[ännern | Bornkood ännern]

1855 is de Rechtswetenschopper Bernhard Matthiass in Loppow boren un 1880 de Germanist Hermann Teuchert.

Weblenken[ännern | Bornkood ännern]

Commons-logo.svg Łupowo (Bogdaniec). Mehr Biller, Videos oder Audiodateien to’t Thema gifft dat bi Wikimedia Commons.


Koordinaten:52° 42′ N, 15° 7′ O