Lingua franca

Vun Wikipedia

Lingua Franca (ital. för „fränksche Spraak“) is:

  1. an un for sik en bestimmte Pidgin-Spraak up Grundlaag vun romaansche Spraken. In dat Middelöller is düsse Spraak bi'n Hannel bruukt wurrn, wenn Lüde, de en romaansche Spraak snacken döen, mit anners wecke tohopenkemen, de nich-romaansche Spraken snacken döen (besunners Araabsch). De Lingua Franca weer för den Ümgang mank de Lüde mit jem ehr verscheden Mudderspraken besunners an de Süüd- un an de Oostküst vun de Middellannsche See wichtig un is bit in dat 19. Johrhunnert bruukt wurrn.
  2. Hüdigendags warrt Lingua franca to jede annere Spraak seggt, de as Verkehrsspraak vun Lüde mit verscheden Mudderspraken bruukt warrt. In de Antike weer dat Koiné-Greeksch Lingua franca in de ööstlichen Delen vun dat Röömsche Riek. In dat Middelöller weer de Latiensche Spraak över ganz Europa hen de Lingua franca. Later is Franzöösch an de ehr Steed treden un hüdigendags is meist över de ganze Welt hen de Engelsche Spraak de Lingua franca, de bruukt warrt, wenn sik Minschen mit verscheden Mudderspraken verstahn wüllt.

Kiek ok[ännern | Bornkood ännern]