Kundus

Kundus, (ok: Kunduz, Qhunduz) is de Hööftstadt vun de Provinz Kundus. Dor leevt up 8039 km² üm un bi 117.000 Minschen.

Kundus liggt in'n Noordoosten vun Afghanistan in dat Kundusdal dicht bi de Grenz vun Tadschikistan. De Stadt is so wat bi 250 km af vun Kabul. Se liggt 397 m öber NN.

De Gegend vun Kundus is fruchtbor un een wunnert sik, wie gröön dat dor is. An dree Kanten vun dat Daal grenzt hoge Bargen direktemang an, an een Siet sünd se en beten wieter weg. Düsse Bargen sünd Utlöpers vun den Hindukusch. In Kunduz gifft dat en lüttjen Flegerhaben, de hett aber bi duchtige Gefechten oorntlich wat afkregen.

As de Regeerung vun de Taliban in dat Johr 2001 afsett wurrn is, güng dat in Afghanistan los mit en international Insatz vun Militär. De International Security Assistance Force (ISAF) keem nah dat Land. As de Upgaven för de ISAF wieder wurrn weern un ok de Noorden vun dat Land dor nu mit tokeem, is in'n Januar 2004 de düütsche Bundeswehr in de Stadt inrückt. Bit an't Enn vun den Mai 2006 weern de düütschen Suldaten midden in de Stadt ünnerbröcht, in een Anlaag, de vördem de US-amerikaanschen Truppen tohören dö. Tosamen mit Suldaten ut Belgien, de Nedderlannen, Ungarn, Rumänien un de USA billt de Düütschen dor dat Provincial Reconstruction Team (PRT). Nu is de PRT in dat nee düütsche Lager bi den Flegerhaben ünnerbröcht.

bi Kunduz

In Kunduz leevt in'e Hööftsaak Tadschiken un Usbeken. Vun den Anfang vun dat 20. Johrhunnert af an sund dor ok Paschtunen henkamen. Dor güngen de Afghanen bi, dat ganze Land in de Hannen vun de Paschtunen to bringen. Kundus is dat Zentrum vun de noordööstlichen Provinzen Kundus, Badakhshan, Baghlan un Tahhar.