Kasimir Fajans

Vun Wikipedia
Kasimir Fajans, 1938

Kasimir (Kazimierz) Fajans (* 27. Mai 1887 in Warschau; † 18. Mai 1975 in Ann Arbor, Michigan) weer en poolsch-US-amerikaanschen Chemiker.

Leven[ännern | Bornkood ännern]

Fejans hett vun 1904 bit 1907 in Leipzig Chemie studeert un dorna wieter bit 1909 in Heidelbarg. 1909 hett he bi Georg Bredig an de Universität Heidelbarg sien Doktor maakt mit en Thema över de stereocheemsche Katalyys. He güng denn an de ETH Zürich, woneem he bi Richard Willstätter arbeit hett, un an de University of Manchester, wo he ünner Ernest Rutherford arbeiten de. 1911 is he denn an de TH Karlsruhe Assistent vun Bredig worrn. In Karlsruhe weer he 1913 habiliteert. In’t Johr 1917 is he uterordig Professer an de Universität München worrn, en JOhr later hett he de düütsche Staatsbörgerschop kregen. In München kreeg Fajans 1925 denn ok en Steed as ordigen Professor för physikaalsche Chemie. !932 weer he Direkter vun dat Institut för Physikaalsche Chemie, wat mit Help vun de Rockefeller Foundation opboet worrn is.

Vunwegen sien jöödsch Afstammen is Fajans 1935 vör de Döör sett worrn. He is dorophen in de USA utwannert un weer vun 1936 bit 1957 Professer an de University of Michigan in Ann Arbor. Em is 1942 de US-amerikaansche Staatsbörgerschop todeel worrn.

Fajans weer verheiraat un hett twee Söhnen hatt.

In’t Johr 1913 hett he togliek mit Frederick Soddy de so nöömten radioaktiven Schuuvsätz opdeckt. Dat glieke Johr hett he mit Oswald Helmuth Göhring en 1,2-Minuuten-Aktivität (UX2) ut Uran isoleert, dat he as nee Element Brevium nöömt hett. De hüütige offizielle Naam vun dit ne’e Element is Protactinium.

Warken (Utwahl)[ännern | Bornkood ännern]

  • 1913 – Radioactive Transformations and the Periodic System of the Elements
  • 1941 – Artificial radioactive isotopes of Thallium, Lead and Bismuth
  • 1947 – Application of the resonance theory to the structure of the water molecule
  • 1948 – Electronic structure of molecules

Weblenken[ännern | Bornkood ännern]