König-Fahd-Damm
De König-Fahd-Damm (araabsch: جسر الملك فهد Dschisr al-Malik Fahd) is en 25 Kilometer lange Straat, de ut Brüggen un Dämm besteiht un den Inselstaat Bahrain över’n Golf von Bahrain (Deel von’n Persischen Golf) mit’n fasten Wall von Saudi-Arabien (bi Khobar, Provinz asch-Scharqiyya) verbinnt. Dat is de eenzige Landweg ut Bahrain rut.
De Straat hett veer Fohrbahnen för Autos un is 24,6 Meter breed. De Straat besteiht ut fiev Brüggen, de alltohoop 12,43 Kilometer lang sünd. De Brüggen sünd dör dat Eiland Umm an Nasan, Dämm un dat opschüddt Zentraaleiland verbunnen.
Historie
[ännern | Bornkood ännern]De eersten Plaans för en Brügg twüschen Saudi-Arabien un Bahrain hett dat in de Johren 1950 geven. En Schridd dor hen weer, dat Bahrain 1967 von Linksverkehr op Rechtsverkehr ümstellt hett, so as he in Saudi-Arabien un de annern Länner in de Region gellt. An’n 8. Juli 1981 hebbt de Minister för Finanzen un natschonale Weertschop von Saudi-Arabien, Mohammed Aba Al-Khail, un de Minister för industrielle Entwicklung von Bahrain, Yousuf Ahmed Al-Shirawi, in Bahrain en Verdrag över’n Dammbo ünnerschreven. De Bo is dör de Bofirma Ballast Nedam utföhrt worrn. An’n 25. November 1986 is de Damm denn von Emir Isa bin Salman Al Chalifa un König Fahd ibn Abd al-Aziz inwieht worrn. Nöömt worrn is de Damm na’n König Fahd von Saudi-Arabien. De Kösten weren 1,2 Milljarden US-Dollar, de kumplett Saudi-Arabien betahlt hett. Bi’n Bo sünd 147.000 Tunnen Stahl verbruukt worrn. 2001 sünd 2,7 Milljonen Fohrtüüg mit estemeert teihn Milljonen Passascheers över den Damm föhrt.
Op halven Weg is en 66 Hektar groot Eiland opschüddt worrn, de to’n halven Deel to Bahrain un to’n annern Deel to Saudi-Arabien höört. Düt Zentraaleiland (araabsch: الجزيرة الوسطية al-Dschazira al-wasatiyya) is de eenzige Landgrenz von Bahrain.
För de Tokumst is plaant, ok noch en König-Hamad-Damm to boon, de ok en Bahnlien över den Golf von Bahrain föhrt.
Weblenken
[ännern | Bornkood ännern]
Koordinaten:26° 11′ N, 50° 21′ O