Junko Tabei

Junko Tabei 1985 an’ Pik Kommunismus

Junko Tabei (japaansch: 田部井 淳子, Tabei Junko; * 22. September 1939 in Miharu, Präfektur Fukushima † 20. Oktober 2016 in Kawagoe) weer en japaansch Bargstiegerin, de an’ 16. Mai 1975 de eerste Frau up den Tipp vun den Mount Everest weer.

As Tabei in dat Öller vun teihn Johren den Nasu-dake in den Nikkō-Natschonalpark besteeg, veränner disse Erfohren hör Leven. Se studeer an de Shōwa-Universität Engelsch Literatur un hett sück den dortigen Bargstieger-Club anslooten. 1969 hett se en Bargstieger-Club för Fruen grünnd. Gemeensam mit hör Mann besteeg se neben den Fuji mehrere japaansch Bargen, aber ok dat Matterhorn in de Swiezer Alpen.

1972 gull Tabei as en vun de best Bargstiegerinnen vun Japan. Dat Dagblatt Yomiuri Shimbun un de Feernsehsenner Nippon TV hemm denn beslooten, en Team blots ut Fruen to dat Bestiegen vun den Mount Everest tosommentostellen. Ut hunnerten vun Bewarfen för disse Expeditschoon wurrn sluutend 15 Fruen utwählt, dormang ok Junko Tabei.

Nah en lang un hart Training is dat Team in dat Fröhjohr 1975 nah Kathmandu reist un hett sück en Sherpa-Team tosommen stellt. Se hemm de sülvig Route bruukt, de de Eerstbestieger Tenzing Norgay un Edmund Hillary nommen harrn. In’ fröhen Mai kampeer dat Team up en Hööcht vun 6300 Meter, as dat Camp vun en Lawine verschütt wurr. De Deelnehmerinenn wurrn ünner de Schneemassen begraven. Junko Tabei verlor för etwa söss Minüüt dat Bewusstween, bit en Sherpa he weer utgraven hett. Up den Everest sünd se denn aber liekers kommen.

1992 weer Junko Tabei de eerste Fru, de de hööchste Bargen vun all söben Eerddeelen besteegen harr, de Seven Summits.

An’ 23. Mai 2000 wurr en Asteroid nah hör nömmt: (6897) Tabei.