Jungfischerschool

De Jungfischerschool in Bremerhoben hett von 1957 bet 1962 in’n Fischereehaven II bestahn un hett Hoogseefischers utbillt.

Historie

In de Hoogseefischeree harr dat an’t Enn von de Johren 1950 en groten Mangel an Nawuss geven. Dorüm hett sik de Verband von de düütschen Hoogseefischereen, de in Bremerhoben seten hett, bi de Stadt Bremerhoben insett, dat dor en School grünnt warrt, de systemaatsch Hoogseefischers utbillen schull.

De Stadtverwaltung hett tostimmt un en Schoolhuus mit Internat an’n Seediek in’n Noorden von de Luunplaat inricht. De Kösten von 610.000 Düütsche Mark hebbt sik de Stadt, de Bundsrepublik Düütschland, dat Land Bremen un de Reeders deelt. De Stadt hett toseggt, de Kösten för dat Ünnerhollen von dat Gebüüd, den Schoolbedriev un den Lohn för dat Lehr- un Hülpspersonal to dregen. De Reederverband schull dat Schoolinventar un de Köst von de Jungfischers betahlen.

In en Lehrgang över dree Maand schullen de Jungfischers allens Nödige över Decksdeenst, Netten, Fischkunn un Landgang biböögt kriegen. In jeden Kurs över dree Maand weer Platz för 60 Schölers. De School kunn in’t Johr also 240 Schölers utbillen. De School weer aver to keen Tied utlast. 1961 harr se tiedwies mehr Lehrers as Schölers. De Reederverband hett sik ut de Finanzerung von de School bald trüggtagen. Dat de School so slecht utlast weer, leeg vör allen dor an, dat de Fischers dat drock harrn, ne’e Lüüd rantokriegen un Matrosen ok ahn School anhüürt un jem lieker Geld geven hebbt, as wenn se nich na de School ween sünd.

Üm 1961 rüm is en 25 Minuten langen Film Hochseefischer över de Jungfischerschool dreiht worrn.