Julius Lorenzen

Vun Wikipedia
Zur Navigation springen Zur Suche springen

Julius Lorenzen (* 24. März 1897 in Flensborg; † 3. Juni 1965 ok dor) weer en düütschen Boinschenör un Böverbörgermeester von Bremerhoben.

Lorenzen is 1897 as Söhn von en Pastoor in Flensborg boren. He hett Timmermann lehrt un denn Boinschenörswesen studeert. In’n Eersten Weltkrieg weer he Soldaat. 1924 hett he as Deepboinschenör in Bremerhoben bi’n Bo von de Columbuskai arbeidt.

Üm 1930 rüm is he Liddmaat von de NSDAP worrn un weer Oortsgruppenleiter von de Partei in Leh un denn NSDAP-Kreisleiter von’n Kreis Wersermünn. 1932 is he as Maat von de Bremerhobener Stadtverorntenversammlung un as ehrenamtlichen Stadtraad för dat Bowesen wählt worrn. In’n März 1933 hett em de Bremer Börgermeester Richard Markert (NSDAP) as Nafolger von Waldemar Becké as kommissarschen Böverbörgermeester von Bremerhoben insett. In’n Mai 1933 is he in dit Amt dör de Stimmen von de NSDAP un de Düütschnatschonale Volkspartei in de Stadtverorntenversammlung bestätigt worrn. In’n September 1933 is he tosätzlich Bremer Staatsraad un Baas von dat Boamt för Technik worrn. 1934 hett he dat Amt as Kreisleiter von de Partei afgeven. 1939 is Bremerhoben Deel von de nee grünnte Stadt Wersermünn un Walter Delius (NSDAP) Böverbörgermeester von disse Stadt worrn. Lorenzen hett sien Amt as Böverbörgermeester afgeven. 1940 schull he Böverbörgermeester von Kalisch warrn. De Stadt leeg in den Deel von Polen, de kort vörher to Anfang von’n Tweten Weltkrieg besett worrn is. Dat Amt hett Lorenzen aver nich antreden. He is denn Böverbörgermeester von Gnesen worrn. Gegen Enn von’n Krieg in’t Vörjohr 1945 hett he de Stadt befehlswidrig verlaten un is dör de Gestapo verhaft worrn un bet an dat Enn von’n Krieg in Haft bleven. De Allieerten hebbt em bet 1948 interneert. Lorenzen hett denn in eenfache Verhältnisse in Hamborg leevt un is 1958 na Flensborg tagen.