Jon & Vangelis

Jon & Vangelis weer en Tosommenarbeit tüschen den britschen Singer Jon Anderson (van de Band Yes) un den greekschen Keyboarder Vangelis Papathanasiou (ex Aphrodite’s Child) up dat Rebeet van de elektroonsch Musik.

Van 1980 bit 1991 hemm se veer Alben inspeelt un harrn mit I Hear You Now un I'll Find My Way Home Tophits. Anderson schreev de Texte un Vangelis hett de Musik komponeert.

De beid Künstler harrn sück Midden van de 1970er-Johren in de britisch Progressive-Rock-Szene kennen lehrt. Vangelis weer för en körten Tiet as Keyboarder bi Yes in‘t Gespräch, nahdem Rick Wakeman de Band verlaaten harr. Vangelis wull sück aber sluutend kien Grupp ünnerordnen. Anderson weer up twee Alben van Vangelis as Gastsinger vertreeden (Heaven and Hell 1975 un See You Later 1980), up en anner Vangelis-Album (Opera Sauvage 1979) harr he Harp speelt.