John Frederick Kensett

Kensett in sien Atelier, ca. 1866

John Frederick Kensett (* 22. März 1816 in Cheshire, Connecticut; † 14. Dezember 1872 in New York City) weer en amerikaansch Maler vun dat 19. Johrhunnert. He wurr vör allen för sien Landschapsmaleree in‘n Stil vun de Hudson River School bekannt un weer 1870 Mitbegrünner vun dat Metropolitan Museum of Art in New York City.

Leven un Werk

John Frederick Kensett wurr 1816 as Söhn von Thomas Kensett, en Stahlsteeker, de ut England nah Amerika utwannert weer, un de sien neeengelsch Fru Elizabeth, borene Dagget, boren. He fung 1828 sien Utbillen in’t Stahlsteeken un Teeken bi sien Vader an, de sück in New Haven daallaaten harr, as ok bi sien Unkel Alfred Dagget. 1829 gung he nah New York un hett een Johr lang bi den Graphiker Peter Maverick arbeit, ansluutend hett he as sülvständig Stahlsteeker arbeit un fung up Anraaden vun sien Früend John William Casilear mit de Landschapsmaleree an.

Sien eerste Utstellung harr Kensett 1838 an de National Academy of Design in New York mit en eenfach as Landscape betitelt Bild. 1840 is he gemeensam mit de Malers John William Casilear, Asher Brown Durand un Thomas Prichard Rossiter nah Europa reist un hett in de folgend söben Johren London, Paris, Düütschland, de Swiez un Italien besöcht. 1847 kehr he nah New York torüch un 1848 wurr he as assozieert Liddmaat in de National Academy upnommen. Een Johr later weer he Vullliddmaat un wurr todem Liddmaat in den Century Club, in den führend Künstler un Literaten vun sien Tiet upnommen wurrn. 1859 wurr he dorto noch Liddmaat vun de National Art Commission, de de künstlerische Utstattung vun dat Kapitol in Washington, D.C. ünner Upsicht harr. 1870 hör he to de Grünner vun dat Metropolitan Museum of Art in New York un weer Liddmaat in de sien Vörstand.

Kensett is an’n 14. Dezember 1872 an en Lungenentzündung storven, nahdem he an’n 31. Oktober 1872 versöcht harr, de Frau vun sien Früend Vincent Colyer, Mary Lydia, vör dat Afsuupen in den Long Island Sound to retten.

Stil

Lake George, tüschen 1860 un 1869

De Landschapsbiller vun John Frederick Kensett sünd dör de Arbeiten vun de Hudson River School präägt. Dorbi sünd sien fröh Warken allgmeen düchtig kräftig un stark vun Thomas Cole as ok engelsch Landschapsmalers as John Constable präägt. Se sünd kraftvull utführt un mit Details as Felsen un Planten utstatt. Nah Midden vun de 1850er Johren keem en starlere Infloot vun Asher Brown Durand in de Biller, wodör se präziser un in den Details nauer wurrn, de Kompositschonen wurrn togliek eenfacher. In de 1860er un 1870er Johren hett Kensett mit minneseert unstrengen Kompositschonen arbeit.

Neben gelegentlich grootformatig Biller hett Kensett vör allen up lütt bit mittleren Formaten malt. He hett immer weer de glieke, vun New York ut eenfach to recken Öörd besöcht, de he mehrfach malt hett, vör allen de Bash-Bish Falls, Lake George un de Küstenregionen vun Newport un Beverly in Massachusetts. De dordör up den eersten Blick bannig ähnlich Biller ünnerscheeden sück dorbi vör allen dör de Kompositschoon, dat Licht un de Atmosphäre.

Bildutwahl

• 
  An Ilex Tree on Lake Albano, Italy, 1846
• 
  Trout Fisherman, 1852
• 
  Niagara Falls, 1853
• 
  Upper Mississippi, 1855
• 
  View of the Beach at Beverly, Massachusetts, 1860
• 
  Mount Washington, 1869
• 
  Lake George, 1870
• 
  Near Newport, Rhode Island, 1872

Literatur

• Thomas W. Gaethgens: Bilder aus der Neuen Welt. Amerikanische Malerei des 18. und 19. Jahrhunderts. Prestel, München 1988, ISBN 3-7913-0879-3, S. 311.
• Stephan Koja: America. Die Neue Welt in Bildern des 19. Jahrhunderts. Prestel, München 1999, ISBN 3-7913-2051-3, S. 264.

Weblinks

John Frederick Kensett. Mehr Biller, Videos oder Audiodateien to’t Thema gifft dat bi Wikimedia Commons.

• Kensett in de Artcyclopedia
• Kevin J. Avery, John Frederick Kensett (1816–1872). In Heilbrunn Timeline of Art History. New York: The Metropolitan Museum of Art, 2000.