Johann Justus Duvigneau
Johann Justus Duvigneau (* 30. Oktober 1885 in Meideborg; † Januar oder Februar 1945) weer en düütschen Verwaltungsbeamten.
Duvigneau is 1885 as Söhn von Emma Auguste, borene Deneke (* 7. Oktober 1864), un Johann August Duvigneau (27. Januar 1854-25. Juni 1940) in Meideborg boren.[1] Sien Grootvader weer Johann Joseph Otto Duvigneau.
He hett Juristeree studeert un is 1908 Gerichtsreferendar worrn.[2] 1911 is he to’n Regerungsreferendar wesselt.[2] 1915 is he as Regerungsassesser bi de Regerung in Meideborg anfungen un güng 1918 as Hülpsarbeider in dat Landraadsamt von’n Kreis Calbe.[2] 1919 güng he denn wedder an de Regerung in Meideborg.[2] He is 1920 as Regerungsassesser bi de Regerung in Schneidemühl anfungen, dor 1921 Regerungsraad worrn un weer 1924/1925 mit dat Verwalten von dat Landraadsamt von’n Landkreis Torgau beopdragt.[2]
In’n Juli 1925 is he toeerst kommissarsch, in’n November denn richtig Landraad von’n Kreis Soltau worrn.[2] Dor is he bleven bet de Kreis to’n 1. Oktober 1932 in’n ne’en Kreis Fambossel opgahn is. He is an’n 19. August 1932 to’n 1. Oktober in einstweiligen Rohstand gahn, aver glieks wedder as Nafolger von Gustav Niendorf kommissarsch Landraad von’n Kreis Pinnbarg worrn.[2] Von’n 15. Mai 1933 bet to sien Dood 1945 weer he dor denn richtigen Landraad.[2] Ofschoonst he vörher de DNVP nah stünn, is he in de NSDAP rin. Nadem Duvigneau Anfang 1945 stört un kort later doodbleven is, is Carl Georg Wittich Landraad in Pinnbarg worrn.
Duvigneau is 1925 ok Geschäftsföhrer von de Kleenbahn Soltau-Ne’enkerken worrn.[2]
He weer verheiraadt mit Käthe Duvigneau. Na ehr hett Mathias Tantau 1942 en Tuchtform von de Roos nöömt (Rosa ‚Käthe Duvigneau‘ 
).