Johann Georg Amann

Vun Wikipedia
Zur Navigation springen Zur Suche springen
Johann Georg Amann (1852)

Johann Georg Amann (* 20. April 1794 in Hartwarden; † 7. September 1852 in Berne) weer en ollnbörgschen Verwaltungsbeamten.

Amann is 1794 in Hartwarden as Söhn von Dorothea, borene Langreuther (1771–1837), un den Amtmann von dat Amt Hartwarden, Hinrich Jacob Amann (1748–1821), boren.[1] In de eersten Johren hett Amann Ünnerricht von sien Vader kregen.[2] To Michaelis 1809 is he denn op dat Gymnasium Ollnborg gahn un dor ünner Rekter Christian Wilhelm Ahlwardt glieks in de Prima kamen.[2] He is bet Michaelis 1811 op dat Gymnasium bleven.[2] Ut sien Studienplään is toeerst nix worrn, von wegen, dat de Franzosen dat Hartogdom Ollnborg innahmen un to en Deel von dat Departement von de Wersermünnen maakt harrn.[2] De Vader harr sien Posten as Amtmann verloren un müss nu as Notar mit weniger Geld utkamen.[2] Johann Georg keem trügg na Hartwarden un hett bi sien Vader de Geschäften as Notar kennenlehrt un för de Franzosen as Översetter arbeidt.[2] To’n 16. Januar 1812 is he as Kontributschoonsinnehmer för de Kommun Abbehusen ernannt worrn.[2] He hett dree Maand in Bremen bi’n Direkter för de direkten Stüürn arbeidt un hett an’n 23. März 1812 sien Amt in Abbehusen antreden.[2]

Nadem de Franzosen slahn weren, hett Amann sik an’n 6. Mai 1814 op de Universität Göttingen för en Studium von de Juristeree inschreven.[2] Sien Vader hett för de Övergangstied dat Amt as Innehmer mit övernahmen.[2] An’n 26./27. Januar 1817 hett he dat Tentamen bestahn un is an’n 18. März as Amtsauditer bi dat Amt Steinfeld beropen worrn.[2] An’n 23. April hett he dor den aktiven Deenst opnahmen un weer för en Tied ok för de Verwaltung von dat Amt Dinklage mit tostännig.[2] An’n 30. September 1819 is he as tweten Sekretär bi dat Landgericht Ollnborg beropen worrn un hett den Posten 1820 aktiv övernahmen.[2] An’n 16. April 1821 hett he dat Examen maakt.[2] To’n 18. November 1821 is he tweten Kamersekretär worrn un een Johr later eersten Sekretär.[2] Amann weer von September 1827 bet 1833 Amtmann von dat Amt Landwörden.[2] In’n Mai 1833 is he denn as Amtmann in dat Amt Berne versett worrn.[2] He weer Kommissär för de Regulerung von de Hoheitsgrenz in de Werser un von 1842 af an Maat von de Braker Schippfohrts-Kommission.[2]

Tohoop mit sien Swager, Johann Ludwig Mosle, hett he sik ok al von 1826 af an för den Bo von’n Hunte-Ems-Kanaal insett, de aver eerst na sien Dood anfungen worrn is.[2] Liekers gellt he as een von de Vaders von’n Kanaal. Allgemeen hett sik Amann jümmer dor för insett, de Infrastruktur von sien ollnbörgsch Vaderland mit Straten un Kanaals uttoboon un de Weertschop to fördern.[2]

Amann hett 1826 Adele von Jägersfeld freet.[2] Sien Söhn weer Wilhelm Ferdinand von Amann (24. November 1839–13. August 1928). In’n August 1852 hett Amann en Nervenfever kregen, an dat he na korte Tied doodbleven is.[2]

Footnoten[ännern | Bornkood ännern]

  1. Hans Friedl: Biographisches Handbuch zur Geschichte des Landes Oldenburg. Isensee-Verlag, 1992, Sied 32
  2. a b c d e f g h i j k l m n o p q r s t u v Neuer Nekrolog der Deutschen. Band 30, 1852, Sied 621ff