Johann Focke
Johann Focke (* 8. Juni 1848 in Bremen; † 10. Dezember 1922 in Bremen) weer en Syndicus vun den Bremer Senaat. He hett dat Focke-Museum in siene Vaderstadt grünnt. Dor is he ok de Baas vun ween. To sien 70. Geboortsdag hett dat dorüm sien Naam kregen.
Leven
[ännern | Bornkood ännern]Johann Focke hett up Afkaat studeert. As he dor fardig mit weer, füng he 1875 an un arbeit as Sekretär vun de Regeern för den Bremer Senat. Bito kümmer he sik ok üm de armen Lüde (Armenpleger) un um dat Arbeitshuus. He weer ok Stellvertreder vun den Standesbeamten.
Dat Museum
[ännern | Bornkood ännern]Vun 1881 af an hett Focke sik vörnahmen, dat he de Bremensien, de he tohopensammelt harr, enerwegens utstellen woll. Denn konnen ok anner Lüde sik dat mol ankieken. As de Stadtbibliothek 1900 in Bremen in ehr nee Huus bi'n Bahnhoff introcken weer, is dat ole, vörmalige Katharinenklooster free wurrn. In'n Krüüzgang konn he denn dat „Historisch Museum“ upmaken. Korte Tiet later weer dat dor al to eng un he kreeg för sien Utstellen dat vörmalige Olenhuus an de Grotenstraten. Dat is in'n Tweeten Weltkrieg in'n Dutt gahn. Hüdigendags is sien Museum in dat ole Goot „Riensbarg“ in den Bremer Oortsdeel Swachhusen ünnerkamen. 1918 hett dat Museum to Focke sien Ehren den Naam kregen: „Focke-Museum für bremische Altertümer“
Johann Focke is de Vadder vun Henrich Focke, de Flegers boot hett un de Focke-Wulf AG mit grünnt hett.