Johann Adolph Poppe

Vun Wikipedia
Zur Navigation springen Zur Suche springen

Johann Adolph Poppe (* 27. Mai 1727 in Hamborg; † 28. August 1807 ok dor) weer en Hambörger Börgermeester.

Poppe is 1727 as Söhn von Anna Catharina, borene Musick (15. Januar 1702–1797), un den Koopmann Johannes Poppe in Hamborg boren.[1] He weer dat drüdde von söss Kinner.[2] He hett dat Lyceum von dat Johanneum in Hamborg besöcht un is an’n 28. März 1746 von Michael Richey op dat Johanneum opnahmen worrn.[2] Von dor is he 1749 an de Universität Jena gahn, üm Juristeree to studeren,[2] un hett an’n 27. Februar 1753 an de Universität Gießen den Dr. jur. maakt.[1] Na dat Studium hett he sik as Avkaat in Hamborg dallaten.[2]

Na’n Dood von Senater Johann Heinrich Winkler hett Poppe an’n 2. April 1868 sien Amt as Senater övernahmen.[2] Von 1768 bet 1770 weer he för dat Broereewesen tostännig un denn för de Opsicht över de Kooplüüd un Hökers.[2] 1772 is he eerst tweten un denn eersten Prätor worrn un harr dat Leid över de Fängnisse.[2] 1770 weer he Maat von’n Utschuss för de Füürwehr.[2] Bet 1776 weer he för de Verwaltung von de Frömmenstüür tostännig.[2]

Von 1778 bet 1784 weer he Amtmann von dat Amt Ritzbüttel.[2] 1784 is he eersten Prätor von de Walddörper un Verwalter von de Wedde worrn.[2] Tosätzlich weer he Bisitter von dat Gericht, dat för de Handwarksmeester tostännig weer, un hett as Wienherr den Wienhannel un de Wienstüürn kuntrulleert.[2] As Börgermeester Albert Schulte 1786 doodbleven is, hett de Senaat em an’n 11. Januar 1786 to’n ne’en Börgermeester wählt.[2] Na’n Dood von Jacob Albrecht von Sienen 1800 is Poppe ok deenstöllsten von de veer Hambörger Börgermeesters worrn.[2] Dat is he bet to sien Dood dör en Slaganfall an’n 28. August 1807 bleven.[1] Na sien Dood is en Börgermeesterpenn för em slahn worrn.

As Börgermeester weer he von 1786 af an Vörstand von dat Gericht för de Handwarksmeesters un von 1789 af an von dat Seegericht.[2] Dat Müntwesen ünnerstünn em 1788 un 1790 un de öffentliche Afteek 1791 bet 1807.[2]

Poppe hett an’n 2. Dezember 1756 Anna Catharina Printz (5. August 1730–1772) freet.[1] De beiden harrn teihn Kinner.[1] Toeerst sünd de beiden Söhns Bernhard Friedrich (* 31. August 1757, bald storven) un Nicolaus Bernhard (12. Januar 1759–9. Januar 1842) boren.[1] Na disse Tied hett Anna Catharina söven Kinner kregen (twee Söhns un fiev Döchter), de all dood boren oder kort na de Geboort doodbleven sünd.[1] Eerst mit Anna Agneta Amalia (* 15. November 1768; hett Nicolaus von Graffen freet) keem wedder Kinnerglück in de Familie.[1] Na’n Dood von siene eerste Fro hett Poppe an’n 10. November 1789 noch wedder freet.[1] Ditmaal Cornelia Overmann (26. August 1742–29. März 1808; Weetfro von Senater Nicolaus Gottlieb Lütkens).[1]

Footnoten[ännern | Bornkood ännern]

  1. a b c d e f g h i j Friedrich Georg Buek: Genealogische und biographische Notizen über die seit der Reformation verstorbenen hamburgischen Bürgermeister. Verein für Hamburgische Geschichte, Meißner, Hamborg 1840, Sied 259f
  2. a b c d e f g h i j k l m n o p Nekrolog von Poppe von Johannes Martin Heinrich Gericke, ut dat Latiensche översett von Christoph W. Büsch