Joannes Baptista Dolar

Joannes Baptista Dolar SJ (ok Dollar, Tollar, Tholarius; sloweensch Janez Krstnik Dolar, * üm 1620 in Kamnik; † 13. Februar 1673 in Wien) weer en Kumponist un Preester.

Dolar weer op dat Jesuitenkolleg von Ljubljana un keem 1639 as Noviez na Wien. Hier hett he Philosophie an de Universität Wien studeert un hett 1642 de nedderen Wiehen kregen. Twüschen 1645 un 1647 hett he an dat Jesuitenkolleg von Ljubljana Ünnerricht geven un denn wieder in Wien studeert. 1652 is he to’n Preester wieht worrn.

Von 1656 bet 1658 weer he musikaalschen Direkter von dat Jesuitenkolleg von Ljubljana. Na en Tied in Passau un Győr is he üm 1661 na Wien as Direkter von dat Jesuitenseminar Sankt Ignatius un Pankratius un musikaalschen Baas von de Konventskirche Am Hof beropen worrn.

He hett Messen, Miserere, Sonaten un Ballette kumponeert. Siene Kumpositschonen sünd in twee Druckutgaven rutkamen: Musicalia varia (1665) un Drammata seu Miserere mei Deus (1666).