Joachim C. Fest

Vun Wikipedia
(wiederwiest vun Joachim Fest)

Joachim Clemens Fest (* 8. Dezember 1926 in Berlin-Karlshorst; † 11. September 2006 in Kronberg in’n Taunus) weer een düütschen Historiker, Publizist un Schriever.

Leben[ännern | Bornkood ännern]

De eersten Johren[ännern | Bornkood ännern]

Joachim Fest is mit twee Sustern un twee Bröder in Berlin upwussen. Sien Vadder weer Direktor an een Middelschool. Later hett he öber sien Vadder seggt, dat weer een Persönlichkeit, de tohopenbröch, wat anunforsik nich tohopen pass. He weer een Börgersmann vun Bildung, een Preußen, he weer kathoolsch un he stünn achter de demokraatsche Verfaten vun de Republik vun Weimar. In de Tied vun düsse Republik harr he allerhand to seggen bi dat Rieksbanner Swart-Root-Gold. Dat weer een Trupp, de just as Suldaten, man freewillig, achter de Republik stünnen. Babenhen weer de Vadder ok Liddmaat vun de Partei vun dat Zentrum. Vunwegen dat he dor mitmaken dö, möß he 1933 Bott geven. De Ämter vun de Nazis hefft dor up keken, datt he sienen Beroop nich mehr utöven dröff. Nich mal privaten Ünnerricht dröff he mehr geven. Fest vertellt in sien Erinnern, datt sien Mudder mal versöcht hett, sienen Vadder to besnacken, he schull sik doch een beten up de Nazis ehr Snacken inlaten un möglicherwies in de NSDAP intreden, dormit he wedder in den Schooldeenst upnahmen weeren konn. Man de Vadder bleev stur. He woll mit de Nazis nix to kriegen hebben. Fest hett süms seggt, dat he liekers een glücklich Kinnertiet verleeft hett.

Toeerst besöch he een Gymnasium in Berlin, man dat duur nich lang, dor kreeg he vunwegen de Politik een „consilium abeundi“ un möß de School verlaten. Een Unkel hett denn för em un siene Bröders betahlt, datt he een kathoolsch Internat in Freiborg in’n Breisgoh besöken konn. In dat Johr 1944 is he tohopen mit siene ganze Schoolklass as Flakhölper nah Friedrichshoben intagen wurrn. 1945 is he bi Remagen an’n Rhien vun de Amerikaners fungen wurrn un bleev dor twee Johr lang. Dornah möök he sien Abitur un studeer Juristeree, Historie, Soziologie, Germanistik un Historie vun de Kunst in Freiborg un in Frankfort an’n Main. Ok vun düsse Tiet hett he seggt, dat weer een glücklich Tiet, wo he allerhand rutfunnen hett, wat mit’n Verstand to kriegen harr.

RIAS Berlin un NDR[ännern | Bornkood ännern]

As he mit sien Doktorarbeit togange weer, schreev Fest Bidreeg för’n Rundfunk, besunners för den RIAS. As se em dor vörslöhn, he konn man richtig bi jem arbeiden, höör he up mit de Doktorarbeit. De Features, de he dor maakt harr öber Lüde, de bi de NSDAP wat güllen, de geev he later rut as een Book mit den Titel: Das Gesicht des dritten Reiches. Vunwegen düt Book hett een amerikaanschen Verlag em fraagt, ob he nich een Biographie öber Hitler schrieven wull. Fest wull dor ober bloß bigahn, wenn klaar weer, dat de Biographie vun Alan Bullock, de dormals as de beste bekeken wurr, to oolt weer un to veel Fehlers upwiesen dö.

In de 1950er Johren weer Fest för annerthalf Tieden vun Sitten (Legislaturperioden) Afoordenten vun de CDU in Berlin-Neekölln. 1961 güng he nah Hamborg. Dor woll he een Steed as Stellvertreder vun den Baas vun de Hööftafdelen (Stellvertretender Hauptabteilungsleiter) annehmen. As he in düsse Position nich so wull, as sien Partei sik dat dacht harr, hefft se em ut de CDU utslaten.

Fest bleev bit 1968 bi den NDR. Tolest folg he Eugen Kogon up as Baas vun de Hööftafdelen för Tietgeschicht. Hen un wenn modereer he ok dat Fernseh-Magazin Panorama. In düsse Tiet harr he man wenig Tiet to’n Schrieven, vunwegen sien Amt un dat, wat he dor to doon harr.

Hitler-Biographie[ännern | Bornkood ännern]

1968 hett Fest Urlaub bi den NDR nahmen un füng an mit de Arbeit an de Hitler-Biographie, de denn 1973 rutkamen is. Dat duur nich lang, denn weer se öbersett in allerhand Spraken. Ok international is he vunwegen düt Book allerwegens bekannt wurrn. Bt up düssen Dag (2006) hett dat Book een Uplaag vun 800.000 Stück harrt. Vunwegen datt sien Geld knapp weer un de Verlag em wat vörschaten harr, möß he Arbeiden annehmen, de dor nich so wiet vun af weeren, so, as dat Book öber Albert Speer. 1977 keem de Film Hitler- een Karrier rut un wurr to’n eersten Mal upföhrt bi de Berlinale. Dor keek jedeneen hen un de Film wurr heel ünnerscheedlich upnahmen un beordeelt.

Frankfurter Allgemeine Zeitung[ännern | Bornkood ännern]

Vun 1973 bit 1993 hett Fest de Frankfurter Allgemeine Zeitung mit rutgeven. He weer dormals de Baas vun dat Feuilleton. In düsse Tiet keem dat ok to den Historikerstriet, vunwegen datt Fest een Artikel vun Ernst Nolte afdrucken laten hett, wo Jürgen Habermas in de Tietschrift Die Zeit denn up antwoort hett. De Artikel vun Nolte heet Verleden, wat nich vergahn will. Em wurr vörsmeten, he nehm den Nationalsozialismus un den Holocaust up de lichte Schuller. Fest hett later Afstand nahmen vun Nolte sien Thesen, man he meen, he harr Recht harrt, as he dor öber snacken wull.

Mit den beröhmten Literaturkritikus Marcel Reich-Ranicki stünn he mal so un mal so. Fest kenn em ut sien Tiet bi den NDR un hool em 1973 an dat Feuilleton vun de FAZ. Anunforsik keemen de beiden goot mit’naner torecht, man bi den Historikerstriet hefft se sik so vertöörnt, dat se nich mehr tosamenkamen sünd, ofschoonst Reich-Ranicki later fökener mal versöcht hett, mit em to snacken.

Af un to hett fest de Kolumnen vun de FAZ bruukt, wenn he oorntlich gegen de lunken Intellektuellen angahn wull. So hett he sik 1976 mit Faßbinder anleggt, weil he den sien Stück De Müll, de Stadt un de Dood partout nich utstahn konn.

He weer anunforsik een Fründ vun de klassisch Maleree un heel nix vun de moderne Kunst nah de Tiet vun den Impressionismus. Man 2001 keem sien Book Horst Janssen rut. Dor seet he sik mit düssen wichtigen Grafiker ut de Tiet nah den Krieg ut’neen. De beiden sünd tietleefs gode Frünnen ween. In dat Book Keen ik drapen hebb stell he beropen Lüde vör, de he persöönlich drapen hett, as Hannah Arendt, Sebastian Haffner, Golo Mann un Rudolf Augstein.

De lesten Daag vun Adolf Hitler in den Führerbunker in Berlin maal he in dat Book De Ünnergang ut. Düt Book is in dat Johr 2004 as Film rutkamen. Bernd Eichinger hett dat Dreihbook schreven un den Film produzeert un Bruno Ganz hett Hitler speelt.

Ok mit Albert Speer hett fest sik befaat. De weer Minister vun de Rüstung ünner Hitler un een vun den Diktator sien besten Bekannten. Fest hölp em bi dat Schrieven vun sien Autobiographie un bröch 1999 een egen Book öber Speer rut. Dor is em bi vörsmeten wurrn, he harr düssen Mann veel to fründlich ansehn.

Ganz tolest hett he in’n Striet üm Gunther Grass sien Biecht, he harr bi de SS mitmaakt, noch vun sik hören laten. He sä: „Vun düssen Mann dö ik nich mal mehr een bruukt Auto kopen...“.

Dood[ännern | Bornkood ännern]

Joachim C. Fest sturv an’n 11. September 2006, just een paar Daag, ehr sien Memoiren rutkamen sünd. De dreegt den Titel Ik nich- Besinnen an een Kinnertiet un Jöögd. He leet sien Fro Ingrid, baren Ascher un twee Söhns torüch. De beiden Söhns, Alexander un Nicolaus, sünd ok Publizisten wurrn. Alexander Fest is een vun de Geschäftsföhrers vun den Rowohlt-Verlag un Nicolaus is Liddmaat vun de Chefredaktion vun de Bild-Zeitung.

Böker[ännern | Bornkood ännern]

Up Platt is nix vun Joachim C. Fest rutkamen.

Film[ännern | Bornkood ännern]

  • Operation Walküre. Regie: Franz Peter Wirth, Produktion: 1971, Joachim C. Fest in een lüttje Rull
  • Hitler - Eine Karriere. Een Film vun Joachim C. Fest un Christian Herrendörfer: 1977, EU: Berlinale 1977, TV-Eerstutstrahlen: 4. Januar 1987
  • Zeugen des Jahrhunderts. Roger Willemsen fragt Joachim Fest. 60 Min. Produktion: ZDF, Eerst Utstrahlen: 2. Februar 2003
  • Hitler und kein Ende. Joachim Fest – Eine Jahrhundertbilanz. Reportaag, 40 Min. Een Film vun Beate Pinkerneil. Produktion: ZDF/3sat, Eerst Utstrahlen: 10. Dezember 2005 (Inhaltsangabe von 3sat)
  • Zur Erinnerung an Joachim Fest. ‚Ertrage die Clowns‘. Joachim Fest - Leistung als Lebensglück. 15 Min. Produktion: ZDF, Eerst Utstrahlen: 13. September 2006

Interviews[ännern | Bornkood ännern]

Weblinks[ännern | Bornkood ännern]

'Nahropen

Fotos