Inisheer

Vun Wikipedia
Wesseln na: Navigatschoon, Söök
Inisheer is an’n wietsten oosten vun de Aran-Eilannen

Inisheer (de angliseerte Form vun’t irische Inis Oírr) is en lütt Eiland an de Westküst vun de Republiek Irland. Dat is dat lüttste bewahnte Eiland vun de Aran-Eilannen, de to’n County Galway höört. Wietere irische Beteken sünd Inis Thiar un Inis Oirthir, man siet 2004 is Inis Oírr de eenzige offizielle Naam[1].

Geografie[ännern | Bornkood ännern]

Steenmuern sünd begäng op Inisheer.

De Flach vun dat Eiland is ruchweg söss Quadraatkilometer. Nich wiet weg is ok de Küst vun’n County Clare, de üm un bi acht Kilometer wiet weg is. 2006 leven op dat Eiland knapp 250 Lüüd, de vör allen in’n Noorden vun Inisheer wahnt, woneem ok de Haven un en Flaaghaven leegt.

Inisheer is en Gaeltacht-Rebeet. Dat heet, dat de Inwahners vör allen irisch snacken doot. Henkamen kann een na Inisheer över Fährlienen vun Rossaveal un Doolin un vun de annern Aran-Eilannen ut. Op dat Eiland gifft dat fief Dörper, vun de Lurgan Village dat bedüdenste is[2]. De anndern heet West Village, Chapel Village, Castle Village un Formna Village. Weertschopplich speelt de Tourismus en grote Rull.

Kultur un Bowarken[ännern | Bornkood ännern]

Wat vun O’Briens Castle nableven is.

In’n Noorddeel liggt ok de Borg vun de O’Briens ut dat 15. Johrhunnert. Se steiht wat höger un is vun de Resten vun en Ringfort ümgeven. Twüschen de Borg un den Flaaghaven steiht de lütte Kark Teampall Caomhán. Se is den Hilligen Kevin vun Glendalough todacht un jeed Johr an’n 13. Juli dat Teel vun en Wallfohrt. Över dat Eiland verdeelt gifft dat Ruinen von wietere Karken. In’n Süüden vun Inisheer steiht en Lüüchttoorn, de aver nich för touristen apen is. An de Oostküst liggt dat Wrack vun den Frachter Plassey, de dor 1960 oplopen is.

Borns[ännern | Bornkood ännern]

  1. List vun de ännerten Oortsnaams, 2004; PDF; 770 kB).
  2. Things to Do in Inisheer.

Weblenken[ännern | Bornkood ännern]

Commons-logo.svg Inisheer. Mehr Biller, Videos oder Audiodateien to’t Thema gifft dat bi Wikimedia Commons.