I Shot The Sheriff

Vun Wikipedia
Wesseln na: Navigatschoon, Söök

I Shot the Sheriff (up Platt: „Ik hebb den Sheriff doot schaten“) is en Leed vun den Reggae-Musiker Bob Marley ut Jamaika un den siene Band The Wailers. Toeerst is dat 1973 up dat Studioalbum Burnin' rutkamen. Bi de Studioverschoon is de Toonaart g-moll un dat Leed duert bi veer'nhalf Minuten. Bi Kunzerten is de Song avers faken in fis-moll speelt wurrn, ok bi den Mittsnitt vun dat famose Live-Album Live! vun 1975. I shot the Sheriff is de leste Single ween, de Marley tohopen mit Peter Tosh un Bunny Wailer rutbröcht hett. Dornah sünd düsse beiden ut de Band utstegen un weern mit en egen Solo-Karriere togange.

An un for sik scholl de Titel vun dat Leed heten I shot the Police, man Marley is bange ween, dat dat denn Theater mit de Regeerung geven dö. So hett he denn den Naam I shot the Sheriff utsöcht. Düt Leed hett Marley to'n lesten Mol an'n 20. September 1980 in den Madison Square Garden in New York City speelt.

En Cover-Verschoon hett de engelsche Blues-Singer Eric Clapton 1974 rutbröcht. Dor is he mit up Platz 1 vun de US-Charts kamen un hett dor den Reggae un sunnerlich Bob Marley unbannig bekannt mit maakt. Annere Cover-Verschonen gifft dat vun Warren G, Screamin' Jay Hawkins, UB40 un Zero Time-Gitarrist Malcolm McDonald.

Weblenken[ännern | Bornkood ännern]