Honnigfabrik Willemsborg
De Honnigfabrik Willemsborg weer en Fabrik för Honnig in Willemsborg in de Industriestraat (fröher Kanaalstraat) an’n Veringkanaal.
Historie[ännern | Bornkood ännern]
De Fabrik is 1906 boot worrn. Dor hett toeerst de Firma Mohr & Co. ut Altno Margarien herstellt. De eersten Anlagen 1906 weren dat Haupthuus, de Warksteed na Süden hen un de grote Schosteen. 1912 keem dor en tweten Flögel to un de Warkhallen an’n Kanaal. Boot worrn is in roden Backsteen. Al 1911 hett Mohr & Co. den ne’en Naam Speisefett-Industrie Elbe GmbH kregen.
In de Johren 1920 is de Firma Mohr Deel von’n Unilever-Kunzern worrn. Vör’n Tweten Weltkrieg hett de Ünnernehmer Fritz Wetz dat Wark övernahmen un de Produkschoon op Ööl un Fett för de Medizin ümstellt. Na’n Krieg denn hett de Firma Gieseke de Fabrik övernahmen un dor Honnig herstellt.
1977 is de Firma Gieseke na Bremen ümtagen. Nadem dat Ünnernehmen uttagen weer, stünnen de Gebüüd leddig. 1978 hett sik dorüm de Vereen Kommunikatschoonszentrum Willemsborg e.V. HONNIGFABRIK grünnt, de sik dor för insetten wull, in dat Gebüüd en Kulturzentrum intorichten. För junge Lüüd jüstso as för all Generatschonen. 1979 weer dat Zentrum denn trech un hett in’n September apenmaakt. 2008 is dat Kulturzentrum renoveert un ümboot worrn un hett dorbi ünner annern dat Treppenhuus ut Glas kregen, dat vondaag de Frontansicht mit präägt. Ok de Willemsbörger Geschichtswarksteed is dor in ünnerbrocht.
Weblenken[ännern | Bornkood ännern]
Honnigfabrik Willemsborg. Mehr Biller, Videos oder Audiodateien to’t Thema gifft dat bi Wikimedia Commons.
- Websteed von dat Kulturzentrum in de Honngifabrik (hoochdüütsch)
Koordinaten:53° 31′ N, 9° 59′ O