Hitchiti
De Hitchiti weern en Indianerstamm vun Noordamerika, de sien Spraak to de Muskogee-Spraakfamilie hörrn dee. In dat 18. Johrhunnert leeg dat Wahnrebeet in den hüüdigen US-Bundsstaat Georgia un de Angehörigen hemm in en Stadt mit glieker Naam leevt. De Stamm weer Naamgever för de Hitchiti-Spraak, de vun tallriek Stämmen in dat zentraal südlich Georgia snackt wurr. De överleeven Hitchiti wurrn in dat 19. Johrhunnert vun de Creek upnommen un integreert. De Mikasuki as Snacker vun de Hitchiti-Mikasuki-Spraak kreegen 1962 de bundsstaatliche Anerkennung as The Miccosukee Tribe of Indians of Florida.[1]
Wahnrebeet
[ännern | Bornkood ännern]In dat 17. Johrhunnert leeg hör Wahnrebeet woll an den Ünnerloop vun den Ocmulgee River nich wiet vun de hüüdig Stadt Macon in Georgia, as dat up fröh engelsch Landkoorten to sehn is. Nah 1715 trucken se in dat Henry County in Alabama, up den Weg to hör bekanntst Wahnoort, de Stadt Hitchiti an dat Oostufer vun den Chattahoochee River, ungefähr 6 km ünnerhalv vun Chiaha. Um 1839 weern all Stämme vun de Region mit Dwang umsiedelt wurrn un leevten jetzt in Reservatschonen in dat dormalig Indianerterritorium, dat hüüdige Oklahoma. De Hitchiti wurrn hier nah un nah vun de Creek-Föderatschoon integreert.[1]
Spraak
[ännern | Bornkood ännern]De Hitchiti-Spraak weer en vun tallriek Dialekten, de in de Muskogee-Spraakfamilie snackt wurrn. In de Kolonialtiet hemm völ överweegend in Georgia leevend Stämme dissen Dialekt snackt, as de Apalachicola, Chiaha, Chiahudshi, Hitchiti, Occonee, Sawokli un Sawokliushi in Georgia un de Miccosukee in Florida. Tallriek Oortsnaams stammen ut disse Spraak un Wetenschapler vermoden, dat de Spraakfamilie dorüm över en völ grötter Rebeet verdeelt weer. Hitchiti is mit en ähnlich Spraak, dat Mikasuki, verwandt un de Snacker vun beid Dialekte können sück ggensiedig verständigen. Wetenschaplich hörrn beid Spraaken to dat Hitchiti-Mikasuki un wurrn to de östlich Ünnergrupp vun de groot Muskogee-Spraakfamilie tellt.[1]
Geschichte
[ännern | Bornkood ännern]Lang Tiet bevör de Europäer nah Georgia keemen, hemm dor de Angehörigen vun de Hitchiti leevt un hör Wahnrebeet gung över den gesamten zentralen, südlichen Deel vun den hüüdigen US-Bundsstaat. Se weern kien Nomaden, ofschons hör Angehörigen in’n gesamten Süden vun Georgia ünnerwegens weern. De Stamm wurr selten in historsch Dokumenten nömmt un de eerste Bericht stammt ut dat Johr 1733, as tweei Repräsentanten vun den Stamm Hööftlinge vun de Creek begleiten deen, um Gouverneur James Oglethorpe in Savannah to drapen. As de US-Indianeragent Benjamin Hawkins de Hitchiti 1799 besöken dee, kunn he faststellen, dat sück de Stamm in twee Siedlungen updeelt harr. De Hitchitudshi oder Little Hitchiti hemm up beid Sieden vun den Flint River ünnerhalv vun de Inmünnen vun den Kinchafoonee Creek leevt, wiels de Tutalosi an‘n Kinchafoonee Creek etwa 32 km westlich vun de Hitchitudshi siedeln deen.[2]
De Spraak vun de Hitchiti wurr nich blots in hör Siedlungen an‘n Chattahoochee River snackt, sonnern ok in den Städten vun den Lower Creek, as Chiaha, Chiahudshi, Oconee, Sawokli, Sawokliudshi un in Apalachicola, as ok in Siedlungen an‘n Flint River un bi den Mikasuki in Florida. Ut verscheeden Oortnaams is fast to stellen, dat ok in wiederen Rebeeden vun Georgia un Florida Hitchiti snackt wurr. Disse Spraak, de ähnlich as de Spraak vun de Creek is, aber en archaischere Form upwiest, wurrd ok as so nömmt wievlich Spraak betekent. Mögelkerwies hemm ok de Yamasee Hitchiti snackt, dat gifft aber kien nipp un nau Nahwies doröver, ov se nich doch en eegen Spraak harrn oder de Spraak vun de Guale snackt hemm.[2]
De indigene Bevölkerung vun Georgia wurr um 1839 dwangswies in dat Indianerterritorium umsiedelt. De Hitchiti wurrn en Deel vun de Creek Nation, hemm aber Överreste vun hör Spraak un Kultur behollen. De Mikasuki, de mit Angehörigen vun de Lower Creek nah Florida inwannert sünd un dor dat Volk vun de Seminolen bildt hemm, kunnen sück as eegenständiger Stamm nee organiseeren. Se kregen 1957 vun Florida de staatliche Anerkennung un 1962 de bundsstaatliche Anerkennung as The Miccosukee Tribe of Indians of Florida. Se snacken deelwies noch hüüd hör traditschonelle Spraak, as ok eenige Angehörige vun de Seminolen. Eenige Nahkommen vun de Hitchiti sünd hüüd över den gesamten Staat Georgia verstreet.[2]
Literatur
[ännern | Bornkood ännern]- Frederick W. Hodge: Handbook of American Indians, 1906.
- Raymond D. Fogelson (Hrsg.): Handbook of North American Indians. Band 14: Southeast. Smithsonian Institution Press, Washington D.C. 2004, ISBN 0-16-072300-0.
Weblinks
[ännern | Bornkood ännern]Enkeld Nahwiesen
[ännern | Bornkood ännern]- ↑ a b c Hitchiti Indians. Afropen an’n 15. Dezember 2016.
- ↑ a b c Hitchiti Indian Tribe. Afropen an’n 15. Dezember 2016.