Histoorsche Tietafsnitten

As Vörgeschicht oder Fröhgeschicht warrt de Tietafsnitt vun de minschliche Geschicht betekent, vun de kene schriftlichen Dokumenten vörhannen sünd. Wi sünd also blots up de Funnen unner use Fööt, up de „Boddenoorkunnen“ anwiest.

De vör- un fröhgeschichtlichen Tietafsnitten sünd na de Warkstoffen benöömt wurrn, ut de de wichtigsten Warktüge un Reedschoppen in de Tiet maakt wurrn:

• Steentiet (1200 bit 1800 v. Chr.)
• Bronzetiet (1800 bit 700 v. Chr.)
• vörchristliche, fröhe oder vörröömsche Iesentiet (700 bit Chr. Geboort)
• nachristliche Iesentiet oder röömsche Kaisertiet (Chr. Geboort bit 400 n. Chr.)
• Völkerwannerungstiet (400 bit 700 n. Chr.)

Ne’erdings warrt ok dat Middelöller mit de Methoden vun de Vörgeschichtswetenschop unnersocht. Wat dar bi rutkummt is to’n Vördeel för dat fröhe un hoge Middelöller, wiel för disse Tiet tominnst in Noordwestdüütschland man wenig schriftlich överlevert wurrn is.

Bi dat Indelen vun de Tietöller mutt’n ümmer bedenken, dat de Övergänge nich nau fasttoleggen sünd, man sik över Jahrhunnerten hentrecken köönt. De Füürsteen weer seker ok noch in de Bronzetiet un de fröhe Iesentiet een vun de wichtigsten Rohstoffen för de Warktüüchmakers, denn Bronze un Iesen mussen importeert weern, un dat weer nich ümmer so eenfach.