Hinstörp

Hinstörp oder hoochdüütsch Hinstorff is en Verlag in Rostock.

Historie

Grünnt hett den Hinstörp-Verlag toeerst blot as Bookhannel 1831 Dethloff Carl Hinstörp in Parchen. Parchen weer to de Tiet Amtsstadt mit dat Oberappellationsgericht un 1835 kreeg Hinstörp Status as Hoffbookhannel bi Hertog Friedrich Franz I. 1835 hett Hinstörp denn ok mit ene Druckeree in Ludwigslust anfungen, sülvs Böker ruttogeven. Vör allen to Recht un Theologie un Schoolböker. 1849 güng dat Ünnernehmen na Wismer, nadem de Hertog ut Ludwigslust un dat Appellationsgericht ut Parchen weg weren. Ok Böker to Landweertschop un Weertschop kemen in dat Sortiment un jümmer wedder ok Böker to de Landskunn. 1864 hebbt se ene Druckeree in Rostock opmaakt un dor dat Rostocker Tageblatt rutgeven. Vör allen groot worrn is de Verlag dör de Warken vun den groten plattdüütschen Schriever Fritz Reuter, de to Enn dat 19. Johrhunnert bi Hinstörp rutkamen sünd.

1907 hett Peter E. Erichson den Verlag köfft. 1942 is de Verlag utbombt worrn. Den 13. Dezember 1946 hett de Verlag wedder Verlööf to’n Drucken kregen un 1947 de Lizenz as Verlag. Erichson möök dat nu mit welk anner Lüüd as Gesellschop. 1959 hebbt de lesten beiden Gesellschoppers den Verlag an dat Ministerium för Kultur verköfft un de Verlag dee nu VEB Hinstörp Verlag heten. Vör allen regionale Themen un Plattdüütsch weren nu in dat Programm, aver ok hoochdüütsche Literatur vun de Gegenwart.

Na de Wenn hebbt se denn ene GmbH vun’n Verlag maakt. Siet dat Johr 1992 höört de Verlag to de Heise Medien Gruppe.

Weblenken

• Websteed vun’n Hinstörp-Verlag (hoochdüütsch)