Hinrich Holsten

Hinrich Holsten (* 29. Januar 1902 in Boitzen; † 9. August 1970 in Rodenborg) weer en düütschen Politiker von de CDU.

Holsten is 1902 in Boitzen boren. He weer op de Middelschool in Rodenborg, de Oberrealschool in Bremen un denn op de högere Buereeschool in Hilmssen. 1928 hett he den Hoff von sien Vader övernahmen. Von 1944 bet 1945 weer he Soldaat in’n Tweten Weltkrieg. He weer en Reeg Johren in de Vorstänn von landweertschopliche Genossenschaften aktiv. Ünner annern in’t Gesamtpräsidium von’n Düütschen Buurnverband un de Vörsitt von de Düütsche Kartuffelunion in Bonn. He weer Vörsitter von de Arbeidsgemeenschop von de Heerdbooksellschoppen in Neddersassen, Vörsitter von de Verkoopsvereenigung Hannöversche Tüchterverbänn in Lehrte un Vörsitter von’n Kreisvereen Rodenborg von dat Neddersassische Landvolk. Holsten is an’n 9. August 1970 in Rodenborg doodbleven.

Holsten weer von’n 9. Dezember 1946 bet 28. März 1947 Liddmaat von’n ernannten Landdag von Neddersassen un denn von’n 20. April 1947 bet 5. Juni 1967 (eerste bet föffte Wahlperiood) Maat von’n Landdag von Neddersassen. In de eerste Wahlperiood is he för den Wahlkreis Oosterholt-Scharmbeek in’n Landdag intagen un in de twete un föffte Wahlperiood för den Wahlkreis Rodenborg. In de drüdde un veerte Wahlperiood is he dor över de Landslist rinkamen. Von’n 28. März 1951 bet 5. Mai 1959 hett he in’n Landdag to de DP/CDU-Frakschoon höört.

1966 hett Holsten dat Grote Verdeenstkrüüz von de Bundsrepublik Düütschland kregen.