Hindustaansche Spraak
| Hindustani (हिंदुस्तानी) | ||
|---|---|---|
|
Snackt in |
Indien, Bangladesh, Fidschi un annere Länner | |
| Klassifikatschoon | ||
| Offitschell Status | ||
| Amtsspraak in | Fidschi | |
| Spraakkoods | ||
| ISO 639-1 |
hi | |
| ISO 639-2 | (B) hin | (T) |
Hindustani ( Up Hindi: हिंदुस्तानी, Hindustānī) is de Naam vun en Spraak ut Noordindien. Düsse Spraak is de Wuddel vun de beiden hüdigen Standardspraken Hindi un Urdu, de dor vun herkaamt. In grode Delen vun den Noorden un vun de Midden vun Indien is Hindustani goot to verstahn.
De Naam Hindustani
[ännern | Bornkood ännern]In'n Loop vun de Johrhunnerten hett sik dat ännert, wat mit den Naam Hindustani meent weer. Toeerst hefft de Lüde dat bruukt, de den Noorden vun Indien mit Gewalt innehmen döen. De snacken persisch un hefft Hindustani as en Naam för de ganzen inheemschen Spraken in Noordindien nahmen. In un um Delhi ümto weer de Regionalspraak Khari Boli tohuse. As later düsse Spraak in den ganzen indischen Subkontinent as en Lingua Franca bruukt wurrn is, kreeg se den Naam Hindustani. Annere Naams för düsse Spraak weern Hindi, Hindavi, Hindui, Bhakha un Rekhta. As de Briten vun dat 18. Johrhunnert af an na Indien kemen un dat an sik reten harrn, menen se mit Hindustani en besunnere Form vun dat Khari Boli, wo wi hüdigendags Urdu to seggt. Düsse Form warrt in de Nastaliq-Schrift schreven un wiest allerhand persische un araabsche Lehnwöör up. Eerst vun den Anfang vun dat 20. Johrhunnert af an versteiht een unner Hindustani de Grundlaag oder de Grundspraak vun Hindi un Urdu oder dat, wat Hindi un Urdu gemeensam togrunn liggt. Vunwegen dat sik Mahatma Gandhi dor so stark för maakt hett, is de Naam „Hindustani“ avers ok en Woort för de Gemeenspraak wurrn, de in ganz Indien över all Grenzen hen snackt un verstahn weern kann.