Hildegard Rauschenbach

Vun Wikipedia
Zur Navigation springen Zur Suche springen

Hildegard Rauschenbach (* 15. März 1926 in Dickschen; † 7. Februar 2010 in Berlin) weer en oostprüüßsche Schrieversche.

Rauschenbach weer 1926 as Hildegard Mischke in Dickschen in Oostprüßen boren. Se wull Schoolmeestersch warrn un Musik ünnerrichten. Dorüm keem se 1942 na ehr Tant na Königsbarg. Nadem ehr Broder in’n Krieg fullen weer, keem se aver 1944 na ehrn Öllernhoff trüch un hett dor mit hulpen. As in’n Oktober 1944 de Rode Armee an Oostprüßen rankeem, is de Familie na Westen flücht. Aver de Rode Armee hett jem 1945 kort achter Danzig inhaalt. Soldaten hebbt sik an de Deern vergahn un Mischke keem för dreeunhalv Johr in dat Arbeidslager 6437 von Schadrinsk in Sibirien.

Nadem se ut dat Lager freekamen is, hett se vonaf 1950 in Berlin leevt, heiraadt un en Söhn kregen. 2010 is se na lang Krankheit doodbleven.

Dat Schrieven hett Rauschenbach 1984 anfungen. In ehr Böker hett se över ehr ole Heimaat un ehr Beleven von Flucht un Gefangenschop schreven. Deelwies in ehr Moderspraak, dat oostprüüßsche Plattdüütsch. Ok en oostprüüßsche Plattdüütsch-Runn hett se in Berlin grünnt un Bidrääg för de Preußische Allgemeine Zeitung schreven. Den 11. November 2002 hett se dat Verdeenstkrüüz an’t Band von de Bundsrepubliek Düütschland un later dat Gollen Ehrenteken von de Landsmannschop Oostprüßen kregen. 2008 hett se von de Landsmannschop Oostprüßen den Kulturpries för Publizistik kregen. Ok för en Mahnmal för de Froonslüüd, de ünner Flucht un Lagerarbeid leden hebbt, hett se sik insett. Dit Mahnmal is 2001 op en Soldatenkarkhoff in Tempelhof opstellt worrn, ok wenn Rauschenbach sik to den Oort nich freit hett, denn na ehr Menen müss so’n Mahnmal an en prominenter Oort stahn.

Rauschenbach hett sik dor för insett, dat dat Leed von de Verdrevenen nich vergeten warrt, hett sik aver togliek ok för dat Vergeven insett un ünner annern Spennen för dat Kinnerhuus in Schadrinsk sammelt.

Warken[ännern | Bornkood ännern]

  • Von Pillkallen nach Schadrinsk. Rautenberg, Leer 1984, ISBN 9783800330638 (2001 ünner’n ne’en Titel Vergeben ja - vergessen nie noch wedder nee rutkamen)
  • Zuhause in Pillkallen. Rautenberg, Leer, ISBN 9783800330621
  • Marjellchen wird Berlinerin. Rautenberg, Leer 1990, ISBN 3792104504
  • Koddrig und lustig. Rautenberg, Leer 1995
  • Marjellchen plachandert wieder. 2005, ISBN 9783800331017
  • Marjellchens verzwickte Verwandtschaft.