Hernán Cortés
| Hernán Cortés | ||
  | ||
| Personen-Informatschoonen | ||
|---|---|---|
| Boortsdag | 1485 | |
| Boortsstell | Medellín | |
| Doodsdag | 2. Dezember 1547 | |
| Doodsstell | Castilleja de la Cuesta | |
| Natschoonalität | Spaansch | |
| Kunnig för | Stört vun de Azteken | |
| Arbeid | Konquistador, Opdecker | |
Hernán Cortés de Monroy y Pizarro Altamirano, 1. Marqués del Valle de Oaxaca, mit Vöörnaam ook Fernando oder Hernando, mit Achternaam ook Cortez (* 1485 in Medellín; † 2. Dezember 1547 in Castilleja de la Cuesta) weer en spaanschen Konquistador, Opdecker un de Baas vun de Expeditschoonen, de för de Daalgang vun dat Aztekenriek sorgen un grote Delen vun dat hüdige Mexiko in’n fröhen 16. Jhd. ünner de Herrschop vun de kastillische Kroon brocht hebbt.
Hernán Cortés keem 1485 in Medellín in Spanien as Kind vun ene Landadelsfamilie op de Welt. He wanner in de Ne’e Welt uut, eerst na Hispaniola, denn na Kuba, wo he ene Ecomienda todeelt kreeg. He weer korte Tied Alcalde (Börgermeester) un wurr 1519 as Baas för drüdde spaansche Expeditschoon op dat mexikaansche Fastland uutsöcht. Wegen siene Fiendschop mit de Gouverneur vun Kuba, Diego Velázquez de Cuéllar, wurr de Expeditschoon kort man vöör de Beginn afseggt. Cortés höör avers nich op de Order vun de Gouverneur un maak sik op’n Weg na Mexiko.
As Cortés op dat Fastland ankeem, verbünn he sik mit Indigenen un kunn so anner indigene Völker beter bedwingen. He bruuk ook ene indigene Fro, Doña Marina, as Översettersche. Se het later Cortés sien eerst Kind op de Welt brocht. De Gouverneur schick Afgesandten na Mexiko, de Cortés fastnemen schullen. He kunn de Afgesandten avers bedwingen. He schreev Breven direkt an den König, de siene Siegen gegen de Indigenen goodheten un em nich wegen sienen Opstand gegen de Gourverneur bestrafen schull. Nadem Cortés dat Aztekenriek stört harr, kreeg he den Titel Marqués del Valle de Oaxaca, wieldes de hoograngig Eddelmann, Antonio de Mendoza, den prestigerieken Titel Viezkönig kreeg. 1541 keem Cortés na Spanien torügg, wo he later doodbleev.
Literatuur
[ännern | Bornkood ännern]- Eberhard Straub: Das Bellum iustum des Hernán Cortés in Mexico. Böhlau, Köln 1976, ISBN 3-412-05975-7.
- José Luis Martínez: Hernán Cortés; Universidad Nacional Autónoma de México, México (D. F.) 1992, ISBN 968-16-3330-X.
- Claudine Hartau: Hernán Cortés. Rowohlt, Reinbeek, 1994, ISBN 3-499-50467-7.
- Hugh Thomas: Die Eroberung Mexikos. Cortés und Montezuma. Fischer, Frankfort an’n Main 2000, ISBN 3-596-14969-X.
- Juan Miralles: Hernán Cortés. Inventor de México. México (Tusquets) 2001, ISBN 970-699-023-2.
- Vitus Huber: Die Konquistadoren. Cortés, Pizarro und die Eroberung Amerikas. C. H. Beck, München 2019, ISBN 978-3-406-73429-8.
- Stefan Rinke: Conquistadoren und Azteken. Cortés und die Eroberung Mexikos. C. H. Beck, München 2019, ISBN 978-3-406-73399-4.
- Felix Hinz / Xavier López-Medellín (Ruutgever): Hernán Cortés revisado. 500 años de la conquista española de México (1521–2021). (Tiempo Emulado. Historia de América y España, Bd. 82.) Iberoamericana Editorial Vervuert, Madrid 2021, ISBN 9788491922483
