Helen Wills Moody

Vun Wikipedia
Helen Wills Moody

Helen Newington Wills Moody Roark (* 6. Oktober 1905 in Centerville, Kalifornien; † 1. Januar 1998 in Carmel, Kalifornien) weer en US-amerikaanisch Tennisspelerin. Tosommen mit de Französin Suzanne Lenglen domineer se de 1920er un 1930er Johren. Wills Moody gellt as en vun de best Tennisspelerinnen vun all Tieden.

Bilanz vun hör Karriere[ännern | Bornkood ännern]

Helen Wills Moody wunn all tosommen 31 Grand-Slam-Titel in Eenzel, Düppel un Mixed. Mit 19 Siegen in de Eenzelkonkurrenzen wurrd se bit hüüd blots noch vun Margaret Smith Court (24) un Steffi Graf (22) överdrapen. Wills wunn söben Mal bi de US-amerikaanisch Meesterschapen (1923–1925, 1927–1929 un 1931), acht Mal in Wimbledon (1927–1930, 1932, 1933, 1935 un 1938) un veer Mal bi de franzöösch Meesterschapen (1928–1930, 1932). Bi de Olympisch Spelen 1924 in Paris wunn se todem twee Goldmedaillen.

Tüschen 1919 un 1938 hett se de nich to glöven Bilanz vun 398 Siegen bi blots 35 Nedderlagen schafft un bleev dorbi tüschen 1927 un 1932 in 158 upnanner folgend Spelen unbesiegt, ahn ok blots een Satz aftogeven. Helen Wills gull över den Tietruum vun acht Johren as de Nummer 1 vun de Welt.

Helen Wills un Suzanne Lenglen – twee Dominatorinnen to de glieker Tiet[ännern | Bornkood ännern]

Ofschons sück de Karrieren vun Suzanne Lenglen (1919–1926) un Helen Wills (1922–1938) immerhen för veer Johren översnieden un beid in de glieker Ära speelt hemm, is dat meest nich to glöven, dat de beid blots eenmal upnanner drapen sünd.

Dit selten Ereignis, togliek en Hööchpunkt in de Karriere vun de beid, funn 1926 statt – dat letzt Johr vun Lenglen as Amateurspelerin. De Französin is 26, sössfach Wimbledon-Winnerin un up den Tipp vun hör Können. Helen Wills is man jüst 20 Johr old. Se harr 1921 un 1922 de natschonalen Jöögdtitel wunnen, weer aber bit 1924 nich to de europäisch Turnieren reist. Hör Speel mangel dat noch an de Riep, de de Amerikanerin in dat nächste Johrteihnt to en meest nich to slahn Spelerin maken sull. Trotz dissen Umstand harr Wills hör potentielle Dominanz up de amerikaansch Bühne all andüüt: 1923, 1924 un 1925 harr se de US Open wunnen, up de de Französin nah den negativen Erfohrungen vun dat Johr 1921 in de Folge verzicht harr. Wills dorgegen harr in disse Tiet de French Open nich speelt, weer aber bi hör eersten Upträe in Europa 1924 immerhen sofort in dat Finale vun Wimbledon intrucken. Dat weer aber jüst dat een Wimbledon-Turnier, dat de Französin, Siegerin vun alle anner Utdragen tüschen 1919 un 1925, krankheitsbedingt all in de darte Runn beenden muss.

Beid sünd also Legenden un Dominatorinnen vun hör Tiet – aber up trennt Bühnen. So kummt dat in Cannes, 1926, to de eenzig, lang verwacht un bannig herbisehnt Slagaftuusch tüschen de „Königin vun Europa“ oder ok: „De Göttliche“ un hör jung amerikaansch Herutforderin. Dat weer dormals ok de Kamp tüschen de glorriek Vergangenheit vun den Tennissport un sien Tokunft. Dat Interesse vun de Apenlichkeit weer so groot, dat nich blots de Platzen an den Rand vun den Court utverköfft weern un hööchste Swaartmarktpriesen betallt wurrn. All de regulär Tickte-Priesen (50 US-Dollar) harrn en – in' Tiethorizont bekeeken – schwindelerrengend Niveau. Ok sämtlich Daaken un Balkone in der nähere Umgegend weern vull mit Minschen. Ünner de prominent Tokiekers weer ünner annern de sweedsch König Gustav.

Lenglen, extravagant eerst Weltstar vun den Sports, berühmt för hör taktisch-infallsriek un variabel Speel, hör ballerinenhaft licht un flink Bewegungen as ok överraschende Nettattacken gegen de sück ehrder swoorfällig bewegen athletisch Rechtshänderin; deren Speel tekent sück vör allen dör de Brachialgewalt vun hör Grundlienslääg up Rück- und Vörhandsiet ut. Aber ok, so seggt Tietgenossen, dör hör butergwöhnlich Antizipatschonsvermögen, dat dat mögelk makt, hör Swächen in Beweglichkeit un Snelligkeit to överspelen. De legendär Donald Budge, en levenslang Beobachter vun den internatschonalen Tennis un tietwies de Mixed-Partner vun Wills, hett sück in de 1990er Johren dorhengahnd ütert, dat „vielleicht mit der Ausnahme von Steffi Graf“ kien anner Spelerin bit hüüd över en sükser Slaghärte verfügt hett as Wills.

Dat dramatisch verloopen Speel sülvst wurrd to'n Mythos un gellt bit hüüd as Steernstünn vun dat Tennis: Lenglen, mehrfach kört vör en Kreisloopverseggen, hett dat denn schafft, mit en groot Kraftanstrengung un mit taktisch Raffinesse, de vermeentliche Nahfolgerin knapp mit 6:3 un 8:6 to dwingen un de Jöögd to besiegen.

De ünnerlegen Helen Wills hett dit Tosommendrapen mit Suzanne Lenglen later liekers as den Hööchpunkt vun hör glanzvull Karriere betekent. Un as wichtigen Wennpunkt: In de Utnannersetten mit de groot Französin harr se begreepen, so Wills later, dat se sück in Tokunft ganz up en mögelk schnöörkelloos Powerspeel un besünners up dat Verbetern vun hör hart Vörhand konzentreeren muss.

Todem wies dat sportlich Ereignis ok en nicht verwacht privat Folgegeschehen: Nah dat Enn' vun dat Speel leet sück dat en gewisser Frederick Moody nich nemmen, Wills sien Bewunnern uttodrücken. En poor Johr later hebbt se heiraadt.

1927–1938: 16 Grand-Slam-Siege in't Eenzel[ännern | Bornkood ännern]

Dat Upnannerdrapen in Cannes bleev de eenzig Begegnung vun de beid Tennislegenden. As de Französin wenig later in't Profilager överwesseln dee, weer de Weg free för Helen Wills Moody, de van 1927 an de lange gültig Rekordtall vun acht Eenzelsiegen in Wimbledon un ok veer Siege bi de French Open (1928–1932) schafft. Mit de bi de US Open nah 1927 errungen wiederen veer Eenzelsiege triumpheer Moody in dissen Tietruum bi nich weniger as 16 Grand-Slam-Konkurrenzen.

Tüschen 1927 un 1932 bleev Wills völlig unslahn un hett nich een Satz verloren. To disse Tiet hett man hör en Ökelnaam geeven: wiels hör ok kritischsten Speelsituatschonen unbewegt un utdruckloos blieven Gesicht wurr ut Helen Wills „Little Miss Poker Face“.

Dat Johr 1927 broch neben grooten Spood wiedere, persönliche Veränderungen: An de Universität von Berkeley kreeg Wills ehrn Afsluss in dat Fack Kunst. En Liedenschap, de de begeistert Malerin bit hör Levensenn' begleiten sull.

1928 gelung hör noch wat besünners: as eerste Spelerin överhoopt wunn Wills dree Grand-Slam-Turniere in dat glieker Johr. Se triumpheer in Paris, in Wimbledon un bi de US Open. Se weer ok de eerste US-Amerikanerin, de up de root Aasch in Paris wunn. Een Spood, den se in direkter Folg dreemal wedderhalen kunn.

1929 hett Helen Wills Frederick Moody heiraadt un speel fortan ünner de Düppelnaam, ünner de se bit hüüd bekannt is. Acht Johr later, 1937, wurr de Ehe schett.

1935 wuur Helen Wills Moody vun AP to Sportlerin vun dat Johr bestimmt.

1938 wunn de 33johrige Wills ehrn letzten Major-Titel: Se triumpheer to'n achten un letzten Mal up den so nömmt hilligen Rasen in Wimbledon. En Rekord – blots schienbor för de Ewigkeit.

Helen Wills weer in dissen Tietruum meest ok Liddmaat vun dat winnen US-Teams bi den dormals Wightman Cup (1923–1925, 1927–1932, 1938), den Team-Länderkamp tüschen USA un England.

In' Oktober 1939 hett se Aidan Roark heiraadt. Een Johr tovör harr se hör Rückträe vun den Wettkamp-Sport verkloort.

Nah den Sport[ännern | Bornkood ännern]

1959 wurr se in de International Tennis Hall of Fame upnommen.

Hör Rekord vun 19 Grand-Slam-Siegen in't Eenzel bleev 32 Johr bestahn. 1970 eerst harr de Australierin Margaret Smith Court mehr wunnen (all tosommen 24 Titelgewinne). En bit hüüd noch nich weer reckt Rekordleistung blifft Helen Wills Moody hör Gesamtbilanz bi de Major-Turnieren: vun 22 Grand-Slam-Turnieren, an den se deelnehm, wunn de US-Amerikanerin 19. Blots dreemal hett se de Finals verloren un keem so up en Karrierebilanz vun 126 Siegen bi 129 Spelen.

Hör Rekord vun acht Eenzelsiegen in Wimbledon ut dat Johr 1938 hull bit 1990, bevör Martina Navrátilová dat up negen Siege verbetern dee.

Wills Moody hett eerst mit 82 Johr dat Tennisspelen upgeven. An' 1. Januar 1998 is se mit 92 Johren storven.

Karrierebilanz[ännern | Bornkood ännern]

French Open
  • Eenzel 1928 bit 1930 un 1932
  • Düppel 1930 un 1932
  • Mixed 1928, 1929 un 1932
Wimbledon
  • Eenzel 1927 bis 1930, 1932, 1933, 1935 un 1938
  • Eenzel Finale 1924
  • Düppel 1924, 1927 un 1930
  • Mixed 1929
US Open
  • Eenzel 1923 bit 1925, 1927 bit 1929 un 1931
  • Eenzel Finale 1922
  • Düppel 1922, 1924, 1925 un 1928
  • Düppel Finale 1933
  • Mixed 1924 un 1928
  • Mixed Finale 1922
Olympisch Spelen
  • Eenzel 1924
  • Düppel 1924
Wightman Cup
  • 1923 bit 1925, 1927 bit 1932 un 1938

Weblenken[ännern | Bornkood ännern]

Helen Wills Moody. Mehr Biller, Videos oder Audiodateien to’t Thema gifft dat bi Wikimedia Commons.