Hayashi-Lien

Vun Wikipedia

De Hayashi-Lien is en Lien in’t Farven-Helligkeits-Diagramm, de meist pielliek steiht. Se grenzt Rebeden, in de en bestännig hydrostaatsch Gliekgewicht mööglich is, af vun Rebeden, in de dat nich mööglich is.

De Hayashi-Lien liggt bi en Effektivtemperatur vun ruchweg 4.000 Kelvin, man er naue Laag hang af vun de Masse vun en Steern: Je grötter de Masse is, desto höger is ok de Temperatur bi de Lien to liggen kummt. Nöömt is disse Grenzlien na Hayashi Chūshirō (* 1920), de 1961 opwiesen de, dat rechts vun disse Lien keen bestännige Steerns tostannen kamen künnt. Steerns, de nipp un nau op de Lien leegt, sünd vullkonvektiv, man in jemehr Mitt herrscht de Bedingen för en hydrostaatsch Gliekgewicht.

En bedüdende Rull speelt de Hayashi-Lien bi’t Entstahn vun Steerns. Wenn een sik de Entwickeln vun de tosamenfallen Materie, ut de en Steern entsteiht, in’t Farven-Helligkeits-Diagramm ankiekt, so kummt se vun rechts op disse Lien to. De Kollaps vun de Materie-Wulk in’n fre’en Fall is to enn, wenn de Hayashi-Lien krüüzt warrt. Man kann dissen Tietpunkt also sotoseggen as Geboortsmoment vun den Steern ansehn. De wietere Entwickeln vun den Steern passeert langs de Hayashi-Lien bi kunstante Effektivtemperatur, bit sik in’n Steern dat Strahlengliekgewicht instellt hett. Vun dissen Tietpunkt an blifft sien Lüchtkraft ruchweg gliek, man sien Böverflach köhlt dör den Kelvin-Helmholtz-Mechanismus wieter af. In’t Farven-Helligkeitsdiagramm wiest sik dat dör en Bewegen na links hen to högere Temperaturen.

Ok bi’t entwickeln vun de Steern in de Phaas na de Hööftreeg speelt de Hayashi-Lien en Rull: Resensteerns künnt disse Lien nich dweren, so dat jemehr wietere Entwickeln in’t Farven-Helligkeits-Diagramm vör de Hayashi-Lien na baven afböögt.

Weblenken[ännern | Bornkood ännern]