Haventunnel

Vun Wikipedia

De Haventunnel is en Tunnel-Boprojekt in Bremerhoben, dat den Togang von de Autobahn 27 to’n Bremerhobener Haven verbetern schall.

Dat Containerterminal Bremerhoben is in de Johren 2000 stark utboot worrn. Dat Containerterminal un de Rest von’n Bremerhobener Haven sünd över de Cherbourger Straat an de Opfohrt 6 Bremerhoben-Överseehavens von de Autobahn 27 anbunnen. In dat Rebeed twüschen de Stadtdelen Speckenbüttel, Leherheid, Schierholt un Leh-Eckernfeld sünd de Hans-Böckler-Straat, de Adolf-Kolping-Straat, de Lotjeweg, de Langener Landstraat un de Wuster Straat an de Cherbourger Straat anbunnen. Dat bedüüdt, dat de Bremerhobener Binnenverkehr twüschen de Stadtdelen un de Verkehr na’n Haven hier openanner draapt. Ok för de Anwahners bedüüdt dat veel Larm un Afgas.

De Haventunnel schall den Verkehr na’n Haven dör en Tunnel ümleiden, so dat disse Verkehr nich mehr an de Krüzungen von de Cherbourger Straat langs mutt. Dat schall Larm un Afgas minnern un dat Tempo von’n Verkehr na’n Haven gauer maken.

De Anfang von’n Tunnel liggt in’n Oosten an’n Noordrand von dat Bredenmoor an de Cherbourger Straat. Von dor geiht he ünner den Ekenweg un de Claus-Groth-Straat langs un drippt denn wedder op de Cherbourger Straat. De Tunnel geiht denn aver toeerst noch ünnereerdsch ünner de Cherbourger Straat langs bet achter de Krüzung mit de Wuster Straat. Dor löppt de Verkehr denn wedder mit de Cherbourger Straat tohoop.

De Bokösten sünd 171,3 Milljonen Euro.[1] Dor von övernimmt de Bund 120 Milljonen Euro, 29 Milljonen Euro dat Land un 7 Milljonen Euro de Stadt Bremerhoben.[1] De Havenweertschoop stüürt 15 Milljonen Euro bi.[1]

De eersten Planungen för den Tunnel hett dat von 2006 bet 2008 geven.[2] An’n 18. Dezember 2008 hett de Bremerhobener Stadtverorntenversammlung de Tunnel-Variante ünner Ekenweg un Claus-Groth-Straat as Vorzugsvariante fastleggt.[2] Dat Plaanfaststellungsverfohren hett an’n 8. März 2011 anfungen un is an’n 19. Dezember 2012 mit’n Plaanfaststellungsbesluss toenn gahn.[2] De Boarbeiden güngen 2014 loos un 2018/2019 schall dat so wied ween, dat de Tunnel an’n Verkehr övergeven warrt.

De Tunnel warrt as Troggbowark boot. Dat heet, de Tunnel warrt in en apene Bokuhl boot, kriggt en Betonsahl un Betonwannen un dor warrt later en Deckel opsett. De gröttste Deel von’n Tunnel besteiht ut een Röhr (1195 Meter), de 14 Meter breed is un een Fohrstriepen in jede Richt hett.[2] De Fohrstriepen sünd 3,5 Meter breed.[2] De Middelstriepen is 1 m breed.[2] Tosätzlich kummt dor buten noch je en Randstriepen von 0,5 m to, de dör en 1,5 m breden Sekerheitsafstand von’n 1 m breden Noodfootpadd trennt is.[2] In’n Oosten deelt sik de Röhr, so dat se niveauliek an de Cherbourger Straat ansluten kann.[2] De Noordröhr warrt 1848 Meter lang un de Süüdröhr 1659 Meter.[2]

De Eer, de dör den Tunnelbo överblifft (540.000 m³) schall deelwies (250.000 m³) op de Eck Cherbourger Straat/Hans-Böckler-Straat to en lütten Barg opschüddt warrn.[2] De Barg warrt 25 Meter hoog un an’n Foot 180×150 Meter groot.[2] Baven schall dat en Plateau von 30×30 Meter geven.[2] Op’n Barg warrt Bööm plant un dat schall en lütten Park warrn.[2]

Verbunnen mit’n Tunnelbo is tosätzlich an de Gaußstraat en ne’e Footgängerbrügg över de Cherbourger Straat boot worrn. De Tunnel kriggt teihn Fluchttreppenhüüs, de an de Böverfläch föhrt, een Hauptbedrievsgebüüd an de Claus-Groth-Straat/Grubke un een Blangenbedrievsgebüüd an’n Lotjeweg. Ok de Skaterpark in’n Speelpark Leherheid, de in’n Dezember 2013 trech worrn is, weer Deel von dat Boprojekt.

De Tunnelboarbeiden föhrt en Gemeenschop ut de Firmen Ed. Züblin AG, Hochtief Solutions AG un Züblin Spezialtiefbau GmbH ut.[3]

Footnoten[ännern | Bornkood ännern]

  1. a b c 15 Millionen Euro für Hafentunnel - Wirtschaft gibt grünes Licht für Finanzierungsanteil an Hafenanbindung, bremerhaven.de an’n 7. August 2012
  2. a b c d e f g h i j k l m Hafenanbindung A27, Bilaag to de Nordsee-Zeitung in’n August 2013
  3. Hafenanbindung A27, Bilaag to de Nordsee-Zeitung in’n Dezember 2014


Koordinaten:53° 35′ N, 8° 36′ O