German TV

German TV weer en Feernsehprogramm op Hoochdüütsch för Tokiekers in de USA un in Kanada, de an Düütsch oder Düütschland intresseert weren oder vun dor weren.

Dat weer en 24-Stünnen-Programm, dat ARD, ZDF (je 40 %) un de Düütsche Welle (20 %) tohoop maakt hebbt. De Redakschoon un de Geschäftsföhrung seten in dat Huus vun DW-TV in Berlin.

Op German TV kemen vör allen Narichten, Informatschonen, Sport, Programm för Kinners, Shows un verschedene Filme.

Anfungen hett dat mit German TV in’n April 2002. Blangen de ganzen USA weer dat in Delen vun Kanada un Latienamerika över Satellit oder Kavel to sehn. Dat weer verslötelt un een müss en Abo hebben, dat een dat sehn kunn.

Dat geev aver nich noog Lüüd mit Abo un de Senner hett sien Programm an’n 31. Dezember 2005 instellt. Dorför kummt siet den 1. Januar 2006 op densülven Programmplatz nu DW-TV vun de Düütsche Welle.