Gentzrode

Vun Wikipedia
Zur Navigation springen Zur Suche springen
Herrenhuus (vörn) un Koornspieker Gentzrode

Gentzrode is en Wesewark in de Gemarken vun de Stadt Reppin, nich wiet af vun de Stadt. Dat is 1876/77 för Alexander Gentz boot wurrn in maurischen Stil. Theodor Fontane hett dor in siene „Wanderungen durch die Mark Brandenburg“ allerhand över schreven.

Geschichte[ännern | Bornkood ännern]

De Familie Gentz[ännern | Bornkood ännern]

In de eerste Hälft vun dat 19. Johrhunnert weer de Afbo vun Törf in dat Wustrauer Luch in vullen Gang. De Törf is mit Scheepe bit na Berlin hen bröcht wurrn un dor to'n böten bruukt wurrn. De Koopmann Johann Christian Gentz ut Reppin weer dor nu mit to Geld kamen. 1855 hett he de „Kahlen Berge“ in'n Norden vun Reppin köfft. Dat weer en sore Sand- un Heidegegend. Tohopen mit sien Söhn Alexander Gentz hett he dor en Bueree-Bedriev upmaakt un hunnertdusende vun amerikaansche Böme (sunnerlich Eken) anplant.

De Koornspieker is 1861 na Plaans vun Carl von Diebitsch boot wurrn. Nadem de Familie up dat Goot tagen weer, hett sik Alexander Gentz vörnahmen, allens heel un deel um to muddeln. He woll dor en Park mit Slott henboen un en Mausoleum. Dat Herrenhuus in Gentzrode is denn in den Stil vun en Orient-Historismus so boot wurrn, as Martin Gropius un Heino Schmieden dat tekent harrn. Den Park hett Gustav Meyer anleggen laten.

Vunwegen, datt dat mit den Törfafbo bargdaal güng (ok wegen Steenköhlen) un wiel de Kösten för dat Wesewark unbannig veel höger weern, as he dat plaant harr, is de Fa. Johann Christian Gentz 1880 in Konkurs gahn. Ok dor hett Fontane vun vertellt.

1881-1934[ännern | Bornkood ännern]

1881 is Gentzrode för um un bi den föfften Deel vun de Bosumme an de Herren Albert Ebell (Unnernehmer ut Reppin) un den Oberamtmann Troll verköfft wurrn. Dat is an to nhemen, datt düsse beiden nie nich vörharrt hefft, datt Goot länger in'e Hand to bolen. So hefft se dat Inventaar un na bloß 10 Maande, in'n Juli 1882, ok dat ganze Goot wieter verköfft.

Nee Eegner is de Unnernehmer A. Wernicke ut Halle an de Saale wurrn. He weer Fabrikant för Maschinen, sunnerlich för Zuckerfabriken. Dat warrt annahmen, datt he vörharrt hett, in Gentzrode Zuckerröven an to boen. Man vunwegen den schraa'en Grund hett he dat fix blieven laten un dat Wesewark na bloß fiev Johre intuuscht gegen dat Goot Konoko in Posen.

So is Paul Hoepffner nee Eegner wurrn, man ok he hett dat Goot in'n Juni 1888, na bloß een Johr, wieter verköfft an den vörmoligen Bremer Konsul in Argentinien, F. W. Nordenholz.

1934 bit up den hüdigen Dag[ännern | Bornkood ännern]

1934 hett de Wehrmacht dat Goot in'e Hand kregen un dat to'n Scheten un to'n Lager för Munitschoon bruukt. 1945 hett denn de Rode Armee de ganze Sake övernahmen. Se hett dor allerhand Hüser toboot un dat Wesewark bit 1992 bruukt. Mank de olen Hüser, de midderwiele unner Denkmalschutz stahn döen, hett de Rode Armee dor en Kino rinboot, twee Plattenhüser, twee Kasernen, een Bööthuus, en Kinnergaarn, en Sauna un en Höker för bit to 5.000 Lüde.

Herrenhuus (2010)

Nadem de Rode Armee aftrocken weer, sünd de Anlagen eerst in Dutt fullen, man denn hett Hans-Werner Angendohr, Unnernehmer ut Werder, dat ganze Weesewark mit um un bi 500 Hektar Land köfft.[1] An un for sik woll he mit sien Partner Gert Friedrich von Preußen dor en Hotel vun maken. Toeerst sünd ok all Russenhüser mit veel Geld un Maschineninsatz afreten wurrn, man denn is dor wieter nix vun wurrn. In Reppin geev dat al to veel Hotels. Nu is al siet en paar Johre gor nix mehr an de Hüser in Gentzrode maakt wurrn. Vundeswegen sünd se in en scheneerlichen Tostand. 2010 hefft de törkschen Investors Volkan Başeğmez un Bilgiç Ertürk dat Goot Gentzrode köfft. De Plaans for de Saneerung liggt in de Hanenn vun den Architekten Sandro Graf von Einsiedel ut Stuttgart.[2]

Galerie[ännern | Bornkood ännern]

Literatur[ännern | Bornkood ännern]

  • Markus Jager: Schloss Gentzrode; (Schlösser und Gärten der Mark); ed. Sibylle Badstübner-Gröger / Freundeskreis Schlösser und Gärten der Mark. Deutsche Gesellschaft e.V.; Berlin 2004.

Weblenken[ännern | Bornkood ännern]

Belege[ännern | Bornkood ännern]

  1. Ruppiner Tageblatt vun'n 14.12.2001, vun'n 08.11.2003, vun'n 14.01.2004 un vun'n 09.03.2004
  2. http://www.maerkischeallgemeine.de/cms/beitrag/11849215/61299 |Türkische Investoren wollen Gentzrode erhalten, vun Reyk Grunow´, an'n 17. Juli 2010, togrepen an'n 30. August 2010